Праваабаронцы абралі дату Дня палітвязня ў Беларусі невыпадкова. 21 траўня — гадавіна смерці ў калоніі палітзняволенага Вітольда Ашурка.
Вітольд — актывіст з Бярозаўкі, супраць якога ў жніўні 2020-га распачалі крымінальную справу за паслявыбарчыя падзеі. Вітольда прысудзілі да пяці гадоў зняволення. Адбываць тэрмін яго накіравалі ў шклоўскую калонію. 21 траўня 2021 года, на 244-ы дзень свайго зняволення, палітвязень Вітольд Ашурак памёр у шклоўскай калоніі. Афіцыйная прычына — спыненне сэрца, хоць, па словах сваякоў, да зняволення на здароўе мужчына не скардзіўся. Родныя дагэтуль не ведаюць, чаму памёр мужчына. Крымінальнай справы па факце ягонай смерці таксама да гэтага часу няма.
1452 чалавекі за два гады атрымалі статус палітвязня
На дадзены момант у Беларусі налічваецца 1186 палітычных зняволеных. За кратамі знаходзяцца прадстаўнікі амаль усіх сацыяльных слаёў беларускага грамадства: праваабаронцы, журналісты, актывісты, палітыкі, студэнты, завадчане, былыя чыноўнікі і сілавікі, настаўнікі, культурныя дзеячы, лекары, будаўнікі, навукоўцы і іншыя. У сувязі з палітычнай сітуацыяй у Беларусі з 1 ліпеня 2020 года статус палітычнага вязня атрымалі 1452 чалавекі!
Што можна зрабіць да Дня палітвязня?
1. Пішыце лісты
Можна падтрымаць палітвязняў даслаўшы лісты, пасылкі ці тэлеграмы або зрабіўшы грашовыя пераводы.
Калі вы знаходзіцеся ў Беларусі, дасылайце заказныя лісты альбо лісты 1 класа. Яны маюць значна больш шанцаў дайсці да адрасата.
З-за мяжы лісты можна дасылаць праз наступныя сервісы:
Письмо.бел
Письма в клеточку
Сэрвіс Белпошты «Электронное письмо» (для яго патрэбна папярэдняя рэгістрацыя акаунта ў аддзяленні Белпошты).
Таксама можна перадаваць лісты праз сяброў ці родных у Беларусі, каб яны пераслалі ліст далей за краты.
Памятайце, што для тых, хто знаходзіцца ў зняволенні, вельмі важна нашая увага і словы спагады. Гэта тое мінімальнае, што мы можам зрабіць, каб іх падтрымаць.
2. Прычапіце да адзення «жоўтую бірку экстрэміста» ў знак салідарнасці з палітвязнямі (прамавугольнік жоўтага колеру памерам 4 на 10 см); 3. Распавядзіце ў сацсетках гісторыю аднаго ці некалькіх палітвязняў з хэштэгам #МойСябраПалітвязень;
4. Напішыце адкрыты ліст-пост палітзняволенаму з хэштэгам #свабодупалітвязням;
5. Запаліце ўвечары 21 траўня ў сябе дома ці ў іншым месцы свечку памяці палітзняволенаму Вітольду Ашурку.
Паводле прэс-рэлізу
