21 лютага, з нагоды Міжнароднага дня роднай мовы, “Арт Сядзіба”, кампанія “Будзьма беларусамі!”, Cаюз беларускіх пісьменнікаў, ПЭН-цэнтр і SAY.BY праводзяць кампанію “Беларускамоўны” і запрашаюць усіх далучацца да святкавання: цягам дня імпрэзы адбудуцца не толькі ў Мінску, але і ў Брэсце, Бабруйску, Віцебску, Гродне і Магілёве!
Распачнецца свята ў сталічнай кавярні “Грай”, дзе выступяць беларускія паэты і музыкі, сярод якіх — гурт AKUTE, UZARI, рэпер ANGST, Усевалад Сцебурака, Наста Кудасава, Марыя Мартысевіч, Стась Карпаў. Культурніцкая праграма будзе жывой і насычанай, а кожны ахвочы зможа ўзяць удзел у шоў “Самшазам” (аналаг гульні “Адгадай мелодыю”). Таксама на другім паверсе прасторы “Грай” будуць дзейнічаць пляцоўкі настольных гульняў, дзіцячых забаў і невялічкі кірмаш.
Каманда SAY.BY адмыслова да свята прэзентуе новую версію мабільнай праграмы для размоваў па-беларуску ў сферы абслугоўвання і штодзённым жыцці. Госці свята змогуць узяць удзел у квэстах з выкарыстаннем праграмы, а самыя актыўныя атрымаюць цікавыя прызы і падарункі.
Дзень роднай мовы – 2018
Уваход вольны, але варта зарэгістравацца.
Інфалінія: +375 25 996 93 76
Кафэ “Грай”, вул. Інтэрнацыянальная, 33
21 лютага, пачатак а 18-й.
Алесь Камоцкі
Літаратурна-музычнай замалёўкай “Хутка вясна” адзначаць свята ў Брэсце. Літаратурную частку прадставіць пісьменніца Наталля Харытанюк, а музычную — Алесь Камоцкі і Алеся Сівохіна.
Прастора “Дзедзіч” (вул. Маякоўскага, 46)
Пачатак а 18-й.
Уваход вольны!
Магілёў наведае пісьменнік і журналіст Алесь Кіркевіч, які правядзе ў Цэнтры “Кола” творчую сустрэчу. А клуб “Волат” прэзентуе магілёўцам сваю “Рыцарскую праграму”: выстава даспеху, сапраўдныя баёўкі на мячах ды шаблях, цікавыя факты пра ўзбраенне нашых продкаў, конкурсы.
Цэнтр “Кола” (зав. Чкалава, 16)
Пачатак у 18.30.
Уваход вольны!
Зміцер Вайцюшкевіч
У Гродне ў Цэнтры гарадскога жыцця адбудзецца канцэрт Змітра Вайцюшкевіча.
Прастора “У цэнтры” (вул. Кірава, 3)
Пачатак а 19-й.
Уваход вольны!
Андрусь Такінданг
У Гомелі можна будзе адсвяткаваць ў Цэнтры беларускай мовы. А 18-й гадзіне тут пачнецца сустрэча з літаратарамі Сяргеем Балахонавым ды Юльянай Пятрэнка, а святочны настрой забяспечыць музычны гурт “Lity Taler”
Цэнтр беларускай мовы (вул. Працоўная, 7А (другі паверх))
Пачатак а 18-й
Уваход вольны!
Сяргей Балахонаў
А на наступны дзень, 22 лютага, у Віцебску адбудзецца творчы вечар Андруся Такінданга.
Арт-паб “Торвальд” (вул. Талстога, 1)
Пачатак а 19-й.
Уваход вольны!
“Спеўны сход” разам з гуртом “Варган”
Завершыцца святкаванне Дня роднай мовы ў Бабруйску 23 лютага, дзе адбудзецца “Спеўны сход” са Змітром Вайцюшкевічам, а моўныя курсы “Мова Нанова – Бабруйск” адсвяткуюць сваё пяцігоддзе. Акрамя гэтага адбудуцца выступы мясцовых гуртоў.
Крэатыўная прастора “1387” (вул. Чангарская, 54)
Пачатак а 18-й.
Уваход вольны!
Святкуем Дзень роднай мовы разам!
