21 снежня ў вучняў 2–3 класаў мінскай школы № 59 быў незвычайны ўрок беларускай мовы. У межах праекта «Чытаем па-беларуску з velcom» яго правялі казачніца Алена Масла і дырэктар па маркетынгу БК «Цмокі-Мінск» Аляксандр Куль.
Варта адзначыць, што і школу № 59 не ў кожнага язык павернецца назваць звычайнай. Вядома, пах сталоўскага супу, вымытых гаспадарчым мылам анучак нікуды не падзеўся. Але са звыклай атмасферы рэзка вылучаецца і казыча нос хлорны пах басейна. А побач з “Інфармацыяй” пра паспяховасць 1″О” класа (так-так, у гэтай школе пятнаццаць першых класаў!) звяртаеш увагу на стэнды з пералікам сусветных рэкордаў і спартыўных зорак, якія іх устанавілі.
Школа прыемна ўразіла спартыўным музеем і аповедамі завуча пра магчымасць бясплатнага наведвання басейна для вучняў і настаўнікаў (тут ладзяцца нават спаборніцтвы паміж настаўнікамі з атрыманнем каштоўных прызоў).
– Са спортам у вас усё добра. Мы бачым. А як з беларускай мовай? – запытала ў запоўненай актыўнымі дзеткамі зале Алена Масла. – Ці ўсё разумееце?
– Даааа! – гучна і радасна адказала зала.
Чытанка прайшла “як па масле”. Уважлівыя дзеткі з радасцю адказвалі на пытанні паводле казкі “Мяне завуць Лахнэска” і нават самі выклікаліся пачытаць са сцэны!
– Гэта ўжо адзінаццатая мая паездка ў межах праекта. І заўсёды вельмі хвалюешся, бо не ведаеш, як атрымаецца ў той ці іншае школе. Часам дзеці проста не разумеюць па-беларуску, не ўспрымаюць мову. І чытаць ім вельмі складана. Дзеткі не слухаюць, пачынаюць гаманіць. Тут усё прайшло выдатна. І з мовай у гэтай школе ўсё цудоўна!
Аляксандр Куль таксама быў прыемна ўражаны. На пытанне “Ці шмат хто з вас наведваў гульні баскетбольнай каманды “Цмокі-Мінск”?” у зале ўзняўся лес рук! “Тады мы добра працуем, – узрадавана сказаў Аляксандр і патлумачыў, што ў абавязкі такой незразумелай дзеткам пасады, як “маркетынгавы дырэктар” акурат і ўваходзіць тое, каб як мага больш людзей ведала каманду і прыходзіла на гульні.
Аляксандр Куль завастрыў ўвагу на тым, як важна натхняцца сваім, беларускім: “Калі я прыйшоў працаваць у каманду, яе лагатыпам быў баскетбольны мяч, баскетбольны кош і герб Мінска. Нічога адметнага, пагадзіцеся. Акурат тады я натхніўся праектам грамадскай кампаніі “Будзьма беларусамі!”, якая пачала папулярызаваць нашага беларускага цмока і выправілася ў падарожжа па Беларусі “У пошуках Цмока”. Так мы сталі адметнай камандай “Цмокі-Мінск”
“На месцы вашых настаўніц мы з Лахнэскай і сапраўдным беларускім Цмокам – Аляксандрам Кулём – зараз жа сабралі б вашыя дзённікі і паставілі вам па беларускай мове дзясяткі! Вы малайцы!” – скончыла ўрок Алена Масла. Аляксандр Куль перадаў у музей школы форменную майку “Цмокаў”.
Цягам трох месяцаў больш за 3000 мінскіх школьнікаў сталі ўдзельнікамі акцыі “Чытаем па-беларуску з velcom”. Ініцыятарам праекта з’яўляецца кампанія velcom пры падтрымцы Камітэта па адукацыі Мінгарвыканкама. Такім чынам аўтары праекта звяртаюць увагу і школьнікаў, і настаўнікаў, і завучаў на тое, што беларуская мова – гэта не толькі творы класікаў у школьных падручніках па літаратуры. Яе носьбітамі з’яўляюцца як прадстаўнікі культуры, так і журналісты, айцішнікі, прадпрымальнікі і спартоўцы.
