«Еўрапейскі каледж Liberal Arts у Беларусі» (ECLAB) адкрывае набор на новую канцэнтрацыю «Сучаснае мастацтва і тэатр».
ECLAB – гэта праект, які дазваляе атрымаць дадатковую адукацыю паводле мадэлі Liberal Arts. Улетку 2015 адбыўся першы выпуск студэнтаў і студэнтак ECLAB, і мы атрымалі ад іх шэраг станоўчых водгукаў аб праекце. У кастрычніку пачаўся новы навучальны год. Студэнты другога набору вучацца ўжо на пяці канцэнтрацыях: да кірункаў «Публічная гісторыя», «Сучаснае грамадства, этыка і палітыка», «Масавая культура і медыя» дадаліся праграмы «Інтэрнэт і грамадства» і «Гендарныя даследаванні».
1 лютага 2016 года пачнецца навучанне па новай праграме «Сучаснае мастацтва і тэатр». Пры распрацоўцы яе канцэпцыі мы арыентаваліся як на сусветныя тэндэнцыі развіцця мастацкіх і тэатральных практык, так і на запыты лакальнага арт-поля.
Сучаснае (contemporary) мастацтва і тэатр уяўляюць сабой складаныя сінтэтычныя з’явы, якія задзейнічаюць розныя віды мастацтваў і выразных сродкаў. У выніку паміж тэатрам і сучасным мастацтвам сціраюцца межы, а традыцыйныя, «статычныя» ўяўленні пра іх прыроду размываюцца. Напрыклад, у сучасным тэатры выкарыстоўваюцца відэа-арт і інсталяцыя, мультымедыя і фатаграфія, а ў сучасным мастацтве – тэатральныя, перфарматыўныя практыкі, элементы Сontemporary dance і г.д. У сучасным тэатры часам складана вызначыць, з чым мы маем справу – з расцягнутым у часе перформансам або эксперыментальным спектаклем?
Пры гэтым нельга не ўлічваць, што арт-свет жыве і развіваецца паводле законаў рынку. У сувязі з гэтым у праграму ўключаны сегмент арт-менеджменту, каб студэнты таксама атрымалі веды і адпрацавалі навыкі прасоўвання мастацкага прадукту на рынку.
Такім чынам, канцэнтрацыя «Сучаснае мастацтва і тэатр» сумяшчае тры раўназначныя сегменты: сучаснае мастацтва, сучасны тэатр і арт-менеджмент. На фоне шмат у чым кансерватыўнай сістэмы беларускай мастацкай адукацыі, якая настойвае на дысцыплінарным падзеле, наша праграма будзе першай эксперыментальнай пляцоўкай у краіне, дзе злучацца сучаснае мастацтва і тэатр. Гэта дазволіць студэнт(к)ам больш эфектыўна шукаць новыя мастацкія формы, а таксама паспрабаваць сябе ў новых сферах арт-дзейнасці.
Навізна і нестандартнасць прапанаванага падыходу заключаецца ў тым, што нашы студэнты цягам усяго семестра будуць адначасова вывучаць тэорыю і практыкі мастацтва і тэатру, а таксама арт-менеджмент. У канцы першага месяца навучання кожны(ая) студэнт(ка) з дапамогай выкладчыкаў вызначыць, на якой менавіта спецыялізацыі хоча і можа сфакусавацца – гэта можа быць тэатральнае майстэрства, арт-крытыка, відэа-арт, напісанне сцэнарыя, рэжысура, перфарматыўныя практыкі, менеджмент і г.д. Гэта таксама дапаможа студэнту(цы) вызначыцца з фарматам свайго ўдзелу ў выніковым праекце, а выкладчыкам – скласці дадатковую праграму яго(яе) навучання.
На працягу ўсяго адукацыйнага працэсу нашы навучэнцы будуць пастаянна ўзаемадзейнічаць адзін з адным, а ў працэсе стварэння выніковага тэатральна-мастацкага праекта кожны(ая) зможа рэалізаваць набытыя навыкі.
Кожны курс канцэнтрацыі «Сучаснае мастацтва і тэатр» – гэта эксклюзіўны прадукт з аўтарскім поглядам на гісторыю мастацтва і тэатру. У нашых студэнтаў будзе ўнікальная магчымасць пачуць цэлы шэраг спецыялістаў з Беларусі і краін блізкага замежжа.
Сістэма Liberal Arts прадугледжвае выкарыстанне інтэрактыўных формаў навучання – навучэнцы будуць удзельнічаць у майстар-класах і дыскусіях, абмяркоўваць творы і тэарэтычныя тэксты. Запланаваныя майстар-класы па рэжысуры і напісанні сцэнарыя, практыкумы па аналізе і складанні фармальнай і абстрактнай кампазіцыі, майстэрні па відэа-арце, а таксама вывучэнне сучасных тэатральных і перфарматыўных тэхнік, якія не выкладаюцца ў мастацкіх ВНУ нашай краіны.
Вучыцца на канцэнтрацыі «Сучаснае мастацтва і тэатр» – гэта значыць знайсці аднадумцаў, набыць міждысцыплінарныя веды і навучыцца крытычна мысліць. Усё гэта дапаможа вам пашырыць поле сваіх магчымасцяў і прастору для прафесійнай і творчай рэалізацыі.
Акрамя вучобы на асноўнай праграме, у студэнтаў ECLAB ёсць магчымасць распрацоўваць і рэалізоўваць свае ідэі ў межах Студэнцкай майстэрні, а таксама браць удзел у праектах Навуковых цэнтраў ECLAB.
Да навучання ў каледжы запрашаюцца асобы, старэйшыя за 18 гадоў. Заняткі будуць праходзіць увечары некалькі разоў на тыдзень. Навучальныя класы месцяцца ў цэнтры Мінска. Адукацыйная праграма разлічаная на чатыры месяцы (з лютага да мая).
Пачатак заняткаў – 1 лютага.
Для паступлення на канцэнтрацыю «Сучаснае мастацтва і тэатр» трэба запоўніць анкету і дадаць да яе матывацыйны ліст. Аўтары адабраных лістоў будуць запрошаныя на сумоўе, па выніках якога адбудзецца залічэнне.
Дэдлайн падачы заявак: 20 студзеня 2016 г.
Набор на канцэнтрацыю абмежаваны (20-25 месцаў).
Кошт навучання на месяц: 700 000 беларускіх рублёў. Студэнт(к)ам ВНУ дзённых формаў навучання прапаноўваецца зніжка 50%.
Калі ў вас узніклі пытанні – пішыце на liberalarts.by@gmail.com
