У італьянскім Турыне 14 мая 2022 года адбудзецца фінал 66-га конкурсу песні Еўрабачанне. У Беларусі песенны конкурс не пакажуць. Глядзець трансляцыю можна на афіцыйным канале ў YouTube.
Чаму букмекеры ставяць на Украіну?
У фінале Еўрабачання прымуць удзел 25 краін. З велізарным адрывам у букмекерскіх канторах Украіна — фаварыт. Яе прадстаўляе рэп-гурт Kalush Orchestra, яны ўжо маюць 59% на перамогу, паводле букмекераў. Калектыў выступае з фолк-кампазіцыяй «Стэфанія» на ўкраінскай мове. Варта адзначыць, што фолкавай кампазіцыяй на конкурсе нікога не здзівіць, яны былі амаль штогод і пераможцамі звычайна не станавіліся. Музычныя крытыкі кажуць, што наўрад ці б на «Стэфанію» звярнулі ўвагу пры іншых абставінах.
Хто за Украінай?
Другое месца букмекеры прагназуюць брытанцу Сэму Райдэру з творам «Space Man», ён мае 11% прагнозаў на пермогу. Далей — выканаўца са Швецыі Карнэлія Якабс з песняй «Hold Me Closer» — 10%. Італьянскі дуэт Мамуд і Бланка з песняй «Brividi» маюць 6%. На іспанку Шанэль з творам «SloMo» ставяць 4%.
Чаму беларусам не паказваюць «Еўрабачанне»?
Беларусь не ўдзельнічае ў конкурсе з мінулага года, калі Еўрапейскі вяшчальны саюз прыпыніў сяброўства Белтэлерадыёкампаніі ў арганізацыі. Прычына — рэпрэсіі супраць мірных дэманстрантаў. Расію выключылі з арганізацыі з-за вайсковай агрэсіі ў бок Украіны. Таму ні ў Беларусі, ні ў Расіі конкурс па тэлебачанні не паказваюць.
«Еўрабачанне» апалітычнае?
Конкурс «Еўрабачанне» прытрымліваецца правілаў апалітычнасці, але правілы не забараняюць выканаўцам у зносінах з журналістамі і ў сацыяльных сетках адкрыта выказваць свае погляды. Шэраг удзельнікаў конкурсу падтрымліваць Украіну і выступаць з асуджэннем расійскага ваеннай агрэсіі.
Некаторыя артысты адкрыта гавораць: яны будуць радыя, калі ўкраінскія прадстаўнікі перамогуць на конкурсе, бо сёння краіне патрэбна падтрымка ўсюды і ва ўсіх сферах, у тым ліку — увага свету.
У фінале зноў на сцэну выйдзе гурт Måneskin, які перамог на «Еўрабачанні» летась. Яны напісалі песню з заклікам адмовіцца ад куплі расійскіх нафты і газу і неаднаразова заклікалі падтрымаць Украіну.
Ці дазволяць арганізатары конкурсу ўдзельнікам гурта выканаць гэтую кампазіцыю — невядома.
