Самы стары будынак Бабруйска, знявечаны, але каштоўны помнік культавай архітэктуры барока, былы езуіцкі касцёл неўзабаве можа цалкам разбурыцца. Прынамсі, да такіх невясёлых думак падштурхоўвае ягоны сучасны стан. У сваім відэашпацыры бабруйскі блогер Validol паказвае, як сёння выглядае былая святыня, піша 1387.by.

Езуіты з’явілся ў Бабруйску на пачатку XVII стагоддзя — у 1618 яны распачалі ў нашым горадзе сваю місіянерскую дзейнасць. У 1631 годзе была заснаваная рэзідэнцыя. Амаль праз сто гадоў езуіты распачалі ў Бабруйску будаўніцтва сваёй святыні — побач з парафіяльным касцёлам Святых Апосталаў Пятра і Паўла на ўзбярэжжы Бярэзіны. Аўтарам праекту новага касцёла стаў віленскі архітэктар Тамаш Жаброўскі. Асвяцілі храм у гонар Святога Станіслава Косткі.

Так выглядаў езуіцкі касцёл у Бабруйску. Крыніца выявы: Слюнькова И.Н. Монастыри восточной и западной традиций. Масква, 2002

Былы езуіцкі касцёл — самы стары будынак у Бабруйску. Ён быў пабудаваны, калі сучаснага Бабруйска яшчэ не было, а на тым месцы, дзе цяпер — руіны крэпасці, размяшчаўся цэнтр сапраўднага еўрапейскага горада — з цэрквамі і рынкавай плошчай. Езуіцкі касцёл — адзіны сведка тых часоў.

Езуіты пакінулі Бабруйск у 1773 годзе, калі ордэн быў скасаваны. Касцёл пасля пачатку будаўніцтва бабруйскай крэпасці было вырашана перарабіць пад цэйхгаўз — сховішча зброі і боепрыпасаў. У савецкія часы ў былой святыні размясцілі склад, а потым — гаўптвахту. У 2005 годзе гаўптвахта была ліквідаваная, касцёл перайшоў на баланс горада і з таго часу разбураецца, з кожным годам — усё больш. Не ратуе яго і статус гісторыка-культурнай каштоўнасці, які ён мае як частка ансамблю крэпасці.

Іезуіцкі касцёл. Фота: @andrey_molvin/Instagram

Блогер Validol лічыць, што калі тэрмінова не прыняць нейкія захады, ужо зусім хутка тое, што засталося ад касцёла, можа разбурыцца цалкам.