Сёлетні фестываль пройдзе 12-14 ліпеня ў традыцыйным месце — у Гарадку пад Беластокам. Апроч музычнай сцэны будзе процьма лекцый, майстар-класаў, сустрэч, імпрэзаў. Фестываль абуджаных TUTAKA стаў адной з самых заўважных культурных падзей рэгіёна. У чым адметнасць сёлетнега фэсту, распавёў кіраўнік фундацыі TUTAKA Павел Станкевіч.

  Павел Станкевіч

Чаму варта заставацца на трэці дзень фэсту

У пятніцу на сцэну выйдуць Аляксандр Памідораў, luty sakavik, :B:N. У суботу, 13 ліпеня, плануюцца выступы Karlen & Co, Syndrom Samazvanca, Разбітае Сэрца Пацана, KOOB, Sw@da х Niczos. У нядзелю выступяць YAŪGEN, ZUI, SOŽ. І гэта толькі музычны line-up.

Павел Станкевіч, кіраўнік фундацыі TUTAKA, у інтэрв’ю Budzma.org кажа, што каманда сёлета вырашыла паспрабаваць падоўжыць фестывальную дзею, зрабіць не двухдзённы, а трохдзённы фестываль.

«Можа быць, хтосьці нам і не давярае, і стане збірацца дадому ўжо раніцай нядзелі, 14 ліпеня, але мы раім застацца, бо ў нядзелю цягам дня будзе чым заняцца на фэсце. Сярод іншага, у гасцях будзе наш знакаміты пісьменнік Уладзімір Арлоў, будзе прыгатаванне і дэгустацыя крупніка — можа быць, гэта палепшыць чаканне вечаровага канцэрту. А ўвечары мы запланавалі прэм’еру альбома, да якога маем самі непасрэднае дачыненне як прадзюсары, гэта новы прадукт ад гурта ZUI, які створаны акцёрамі Аленай Зуй-Вайцяхоўскай і Міхасём Зуём — яны ж Алена Жалудок, зорка «Шчучыншчыны» і Сяргей Мікалаевіч з «Чын-чын чэнэлу», — кажа Павел Станкевіч.

Фестываль абуджаных Tutaka (2023). Фота: Руслан Серадзюк

Цягнік TUTAKA

Ёсць яшчэ адна рэч, паводле кіраўніка фундацыі, якая не тычыцца зместу фестывалю, але робіць яго яшчэ больш камфортным і дасяжным. «У нас будзе свой адмысловы цягнік, які называецца TUTAKA, на ім нават так і напісана будзе — TUTAKA.

Цягнік будзе ісці: з Беластока ў напрамку TUTAKІ (станцыя Валілы/Waliły) ва ўсе дні фэсту а 18:10 (прыбыццё на месца а 18:55), і ад TUTAKІ (станцыя Валілы/Waliły) у напрамку Беластока 13.07 (у суботу) і 14.07 (у нядзелю) а 2:00 (прыбыццё а 2:45), 15.07 (у панядзелак) а 1:00 (прыбыццё а 1:45), — распавёў Павел Станкевіч. — Калі хто вырашыць, што яму не вельмі зручна ночыць на намётавым полі, то можа спакойна вярнуцца ў Беласток. Канечне, гэта калі яму ці ёй не шкада згубіць самую найлепшую начную тусоўку.

Удалося гэта зрабіць у супольнай працы з кіраўніцтвам Падляскага ваяводства і з перавознікам Regio.

Таму нейкія нараканні, што вось, не магу дабрацца ні аўтаспынам, ні машынай, ні гарадскім транспартам, не пройдуць — трэба быць на фэсце TUTAKA».

Зразумела, што арганізатары фэсту разлічваюць на большую колькасць гасцей, чым у папярэднія гады: «Будзе наша традыцыйнае намётавае поле, але на ўсялякі, падрыхтаванае яшчэ адно». Карысныя парады наконт начлега на намётавым полі і правілы чытайце тут/

Разнастайнасць: ад традыцыйнай культуры да майстар-класаў па менэджмэнце і псіхалогіі

Вядома, што фэст TUTAKA — пераемнік легендарнага «Басовішча». Пры гэтым заўважна, што нашчадак яўна хоча пашырыць поле дзейнасці.

«Басовішча» было вельмі класным фарматам для пакалення наведвальнікаў, якія нарадзіліся ў 60-х, 70-х і 80-х. Для іх вось рок, а за ім панк — гэта было самым тым неабходным. Гэтага было дастаткова для настрою, для таго, каб добра тусавацца. Перадусім цяпер мяняецца беларуская музыка — і варта гэта паказваць. Ад пачатку ў 90-м годзе і потым ўсе 90-я канцэпцыя «Басовішча» — гэта такі супраціў, замяшаны на року і панку, то, як мне падаецца, зараз будзе недастатковым выказвацца толькі праз рок-супраціў ці панк-супраціў. Крыху трэба шырэй з культурай. Стараемся адсочваць іншыя фарматы, апроч музыкі, намагаемся паказаць увогуле іншыя жанры мастацтва, хаця гэта і складана падчас аднаго фэсту, — тлумачыць Павел Станкевіч. — Пакуль што нашы спробы, можа быць, не ў такім ужо і вялікім аб’ёме атрымоўваюцца, як хацелася б, але паглядзіце расклад толькі майстар-класаў, майстэрняў — мы хочам даць магчымасць дакрануцца кожнаму беларусу да нейкай нават дробязі з гэтай нашай агулам беларускай культуры. Прынамсі, даведацца пра яе.

Тут маем разнастайнасць — ад майстар-класаў па традыцыйнай культуры да майстар-класаў па менэджмэнце ці па псіхалогіі. То бок гэта ўсё, што цяпер укладаецца ў жыццё чалавека, які сочыць не толькі за рок-канцэртамі і піўкам пад яго. Мне падаецца, што ёсць больш жаданняў, каб агулам культура нашага грамадства развівалася і не толькі ў такім музычным супраціве».

Прастора для іншых арганізацый

Акрамя таго, заўважае Павел Станкевіч, TUTAKA дае прастору іншым арганізацыям, якія хочуць пра сябе сказаць: «У нас на фэстах прысутнічалі заўсёды розныя ініцыятывы. Сёлета маюць быць «Вольныя», «Палітвязынка», другі раз з намі ў партнёрстве «Вясна», BYSOL, шмат іншых розных ініцыятыў ды арганізацый. Не так шмат пляцовак і магчымасцяў зараз, каб, прыкладам, з BYSOL face-to-face паразмаўляць, запытаць нешта наўпрост, ці з выдавецтвам-бібліятэкай Kamunikat. Мне падаецца, гэта вельмі важна. Хаця, на шчасце, паглядзеўшы на фестывальную мапу лета, бачна, што такіх пляцовак робіцца больш».

Праца над новым фэстам

Фестываль абуджаных Tutaka (2023). Фота: Руслан Серадзюк

Ну а праца над новым TUTAKA «пачынаецца пры закрыцці папярэдняга фэсту». «Вядома, што не з такім велізарным напружаннем, як у перадапошнія месяцы чатыры. Заўжды падчас фестывалю бачыш, адчуваеш нейкія пралікі, касякі, але яны таксама непазбежныя і неабходныя нават — гэта дае досвед, які дазволіць ахапіць яшчэ больш шарокую праграму. Памылкі вучаць. Пры гэтым па дарозе мы ж маем розныя падзеі, прыкладам, той жа фэст «Сонцаграй», іншыя імпрэзы», — сказаў на заканчэнне Павел Станкевіч.

Праграма фестывалю

Адкрыццё прасторы 12.07 ПЯТНІЦА, час — 13.00

Пачатак актыўнасцяў 16.00 (Мова Нанова, Батлейка, акцыя салідарнасці з палітвязнямі, і г.д.)

Канцэрты 21.00-00.00 (Аляксандр Памідораў, luty sakavik, :B:N)

DJ пачатак 00.00

13.07 СУБОТА

Пачатак актыўнасцяў 11.00

(лекцыя па польскаму слэнгу, майстар-клас па праектнаму планаванню, майстар-класы па хуткім скетчынгу, нефармальная лекцыя «Музычная візітоўка Беларусі», лекцыя па сэлфменеджменту, батлейка, кінапаказы, ёга, дыскусіі, дзіцячы музычны канцэрт і.д.)

Адкрыццё галоўнай сцэны 20.30

Канцэрты 21.00-01.00 (Karlen & Co, Syndrom Samazvanca, Разбітае Сэрца Пацана, KOOB, Sw@da х Niczos )

DJ пачатак 01.00

14.07 НЯДЗЕЛЯ

Пачатак актыўнасцяў 12.00

(крупнік, кінапаказы, сямейны спектакль, варштаты беларускага традыцыйнага танца, тэатралізаваныя гульні для дзяцей, і г.д.)

Канцэрты 20.00-23.00 (YAŪGEN, ZUI, SOŽ)

Удзел у фестывалі бясплатны.

З поўнай праграмай фестывалю можна азнаёміцца па спасылцы. 

Рыгор Сапежынскі, budzma.org