Навошта шатландцам глядзець «Купалу» і чаму паказ можа быць юрыдычна незаконным, распавёў журналіст і кінааглядальнік Тарас Тарналіцкі ў тэлеграм-канале «Свяшчэнны Белавуд».
Версія фільма — пірацкая?
Забаўляльны цэнтр Sammerhall у шатландскім Эдынбургу правядзе прэм’еру «Купалы». Сеанс фільма павінен адбыцца 8 снежня ў 19 гадзін. На паказ прадаюцца квіткі: 8 фунтаў за анлайн-куплю, 10 фунтаў за ўваход, для беларусаў і ўкраінцаў з пашпартам — бясплатна.
Гэта паказ пірацкай недапрацаванай версіі фільма, якую злілі ў сеціва телеграм-каналы восенню 2020 года. Вось як праект апісваецца на сайце забаўляльнага цэнтра: «Не ўпусціце магчымасць убачыць гэтую гістарычную эпапею, якая забаронена ў Беларусі ў першую чаргу праз тое, што фільм жорстка асвятляе гістарычныя рэпрэсіі супраць тых, хто крытычна ставіцца да дзяржаўных органаў і вядзе да распальвання дыктатарафобіі!»
Што думае стваральнік фільма і адміністрацыя забаўляльнага цэнтра?
Рэжысёр фільма Уладзімір Янкоўскі пацвердзіў Тарасу тарналіцкаму, што нічога не ведае пра паказ фільма ў Вялікабрытаніі. І заявіў, што гаворка хутчэй за ўсё ідзе пра пірацкую копію фільма.
У забаўляльным цэнтры Sammerhall журналісту адказалі па электроннай пошце, што таксама не ў курсе сітуацыі, што ў іх паказваюць пірацкі кантэнт і паабяцалі, што адкажуць пазней.
Што думае на гэты конт кінааглядальнік Тарналіцкі?
«Я са свайго боку магу адзначыць, што за апошнія два гады перагледзеў стаўленне да прагляду злітай у сетку і недапрацаванай версіі фільма.
За гэты час стала ясна, што Мінкульт разам з "Беларусьфільмам " канчаткова паклалі фільм на паліцу. Навін аб ім больш не з’яўляецца, а значыць, і магчымасці ўбачыць стужку ў бліжэйшай будучыні не будзе.
Таму нічога страшнага ў паказе для адукацыйных мэтаў няма», — піша журналіст, але звяртае ўвагу, што за продаж квіткоў на кінапаказ арганізатараў могуць прыцягнуць да адказнасці ў той жа Шатландыі. «Гэта ўжо парушэнне закона аб інтэлектуальнай уласнасці і аўтарскім праве», — рэзюмуе Тарас Тарналіцкі.
«Купала» — гэта біяграфічны фільм аб жыцці і смерці нацыянальнага паэта Янкі Купалы. Яе здымаў рэжысёр Уладзімір Янкоўскі на кінастудыі «Беларусьфільм». Карціна здымалася ў 2019 і 2020 гадах, але так пасля і не была паказана ў Беларусі. Адзіны публічны паказ адбыўся на Маскоўскім кінафестывалі «Маскоўская прэм’ера» восенню 2020 года.
