Унёсак адукацыйных праграм і праектаў у паляпшэнне якасці жыцця беларусаў з’яўляецца мэтай ІІІ-га Фестывалю нефармальнай адукацыі, які адбудзецца 8-10 кастрычніка ў Мінскім міжнародным адукацыйным цэнтры імя Я.Рау. Удзел у імпрэзе возьмуць прадстаўнікі грамадскіх, камерцыйных і дзяржаўных адукацыйных арганізацый і установаў з Беларусі, Нямеччыны і іншых краін.
Задачы Фестывалю 2010:
1. Прадставіць нефармальную адукацыю як сістэму, якая забяспечвае развіццё сацыяльных, грамадзянскіх, прафесійных кампетэнцый і творчых здольнасцяў асобы на працягу ўсяго жыцця.
2. Прэзентаваць разнастайнасць праграм (для моладзі, сталых людзей, сельскіх жыхароў, людзей з абмежаванымі магчымасцямі, сем’яў, жанчын, мужчынаў, прафесійных груп, няўрадавых арганізацый і інш.).
3. Спрыяць абмену досведам і наладжванню партнёрскіх сувязяў.
4. Абмеркаваць тэндэнцыі і стратэгіі развіцця нефармальнай адукацыі як інструмента павышэння якасці жыцця ў Беларусі і за мяжой.
На працягу трох фестывальных дзён адбудуцца:
– прэзентацыі разнастайных адукацыйных праграм і праектаў;
– майстар-класы ў выкананні найлепшых адукатараў;
– творчыя конкурсы;
– дыскусіі па актуальных пытаннях развіцця нефармальнай адукацыі ў нашай краіне і за мяжой;
– цікавая культурная праграма;
– знаёмства з патэнцыйнымі партнёрамі для рэалізацыі адукацыйных і асветніцкіх ініцыятыў.
Сёлетні Фестываль нефармальнай адукацыі адбудзецца ў межах Тыдня Нямеччыны ў Беларусі. Асобныя мерапрыемствы Фестывалю будуць прысвечаныя дэманстрацыі нямецкага досведу ў сферы адукацыі дарослых.
Фестывалі як форма прасоўвання нефармальнай адукацыі і адукацыі дарослых папулярныя ў многіх краінах свету. Беларусь далучылася да фестывальнага руху ў 2006 г. З таго часу Фестываль стаў традыцыйнай пляцоўкай для абмеркавання актуальных пытанняў і перспектыў развіцця нефармальнай адукацыі ў Беларусі і ў еўрапейскіх краінах.
Мінулы Фестываль ў 2008 годзе сабраў на сваёй пляцоўцы больш за 200 прадстаўнікоў адукацыйных і асветніцкіх арганізацый, якія працуюць у сферы адукацыі дарослых і моладзі ў Беларусі, а таксама адукатараў з Германіі, Даніі, Польшчы, Расіі і Украіны. Каля 250 чалавек наведалі прэзентацыі шырокага спектру праграм арганізацый-удзельнікаў і майстар-класы па розных адукацыйных тэмах.
Арганізатарамі Фестывалю выступаюць 14 адукацыйных і асветніцкіх арганізацый, якія прадстаўляюць розныя сферы і напрамкі дзейнасці.
Кантакты для сувязі: +375 17 269-90-34
+375 33 619-60-68 – Аліна Радачынская
Падрабязная інфармацыя:
www.adukatar.net www.dvv-international.by
