Беларусь траціць на навукова-даследчыя і доследна-канструктарскія распрацоўкі (НДВКП) менш за ўсе еўрапейскія краіны і параўнальная ў гэтых адносінах толькі з Румыніяй, піша thinktanks.by.
У бюджэце Рэспублікі Беларусь ў 2021 годзе запланаваны ВУП на ўзроўні 157 276,6 млн. рублёў. З іх на навуку і інавацыйнае развіццё будзе накіравана 460,75 мільёна рублёў.
Гэта ўсяго толькі 0,29% ад ВУП. У разліку на душу насельніцтва атрымліваецца 49 рублёў або парадку 16-17 еўра, падлічыў партал Information Policy.
Параўнаем з выдаткамі на НДВКП у еўрапейскіх краінах.
Па дадзеных за 2020 год, у Еўрасаюзе ўрады вылучылі на навуку ў сярэднім 0,8% ВУП. Гэта каля 225 еўра на чалавека.
Найбольшая колькасць асігнаванняў была зарэгістравана ў Люксембургу (648 еўра на чалавека), за ім ідуць Данія (519 еўра) і Германія (443 еўра).
Менш за ўсё на навуку вылучылі сродкаў у разліку на душу насельніцтва Румынія (15 еўра на чалавека), Балгарыя (21 еўра) і Венгрыя (39 еўра).
Атрымліваецца, Беларусь знаходзіцца на ўзроўні аўтсайдэра Еўропы — Румыніі.
