18 траўня ў Варшаве адбудзецца вялікі канцэрт, прысвечаны 50-годдзю з дня нараджэння Аляксандра Кулінковіча, легенды беларускага панк-року, нязменнага лідэра гурта Neuro Dubel.

Канцэрт адбудзецца ў клубе «Remont», ul. Waryńskiego 12a, 18 траўня. Найлепшыя хіты гурта заспяваюць дзевяць музыкаў беларускай альтэрнатыўнай сцэны: Lavon Volski, Юры Стыльскі (Дай Дарогу), Дзяніс Тарасенка (РСП), Znich, Алесь Дзянісаў (Dzieciuki), Аляксандр Памідораў, Зьмяя, Lesley Knife (Gods Tower), Анастасія Шпакоўская (Naka). Арганізатары сцвярджаюць, што падобнага беларускага канцэрта ў Варшаве яшчэ не было.

Аляксандр Кулінковіч 17 ліпеня 1989 году заснаваў гурт Neuro Dubel, лідэрам якога і з’яўляўся да сваёй смерці. Пісаў музыку і тэксты. За час свайго існавання гурт выпусціў 16 альбомаў. Апошні альбом пад назвай «Першы» выйшаў у 2017 годзе. Двойчы гурт станавіўся пераможцам «Рок-каранацыі», у 1998 і 2007 гадах. У пачатку 2000-х гадоў Кулінковіч супрацоўнічаў з гуртом «Крамбамбуля». У розныя часы быў аўтарам выданняў «БелГазета»," Советская Белоруссия", сайта Naviny.by і часопіса"Sexus«.

3 жніўня 2018 года Аляксандр адправіў СМС бубначу гурта Андрэю Сцепанюку, што дрэнна сябе адчувае і выклікае хуткую. Музыка трапіў у рэанімацыю. Памёр раніцай 4 жніўня. Прычынай смерці называюць праблемы з лёгкімі, дакладней «схаванае запаленне лёгкіх». У дзень смерці музыкі гурт Neuro Dubel павінен быў выступаць на фестывалі «Рок за Баброў». Пахаваны на могілках вёскі Анопаль, што на міншчыне.