У Вярхоўнай Радзе зарэгістравалі законапраект, які забароніць распаўсюд на тэрыторыі Украіны кніг, надрукаваных у Беларусі ці Расіі. Пра гэта паведаміў у сваім фэйсбуку народны дэпутат Уладзімір Вятровіч.

«Мэта гэтага дакумента — перакрыць уплыў "рускага свету" на ўкраінскае кнігавыданне і кнігараспаўсюджванне як звонку, так і знутры краіны. Законапраект прадугледжвае забарону імпарту кніг з Расіі і Беларусі, спыненне продажу раней увезеных рускіх кніг, амаль поўная забарона друку і ўвозу твораў грамадзян Расійскай Федэрацыі (гаворка ідзе менавіта пра грамадзян РФ, а не пра "мёртвых рускіх" накшталт Пушкіна з Дастаеўскім)», — распавядае пра мэты законапраекта Уладзімір Вятровіч.

Норма законапраекта прадугледжвае, што кнігі ва Украіне выдаюцца на ўкраінскай мове, мовах ЕС і карэнных народаў Украіны:

«На іншых мовах (у тым ліку на рускай) могуць выдавацца арыгінальныя творы, але не пераклады. Гэтая норма заблакуе планы "рускага свету" захапіць наш кніжны рынак знутры. Сусветная літаратура, уключаючы папулярныя кніжныя навінкі будзе звяртацца да нашых чытачоў на ўкраінскай мове або на мовах арыгіналу», — падкрэслівае народны дэпутат.

Суаўтарамі законапраекта сталі больш за 50 дэпутатаў з розных фракцый, у тым ліку старшыня Вярхоўнай Рады і яго намеснікі.