Неверагодныя майстар-класы на фестывалі bе2gether будзе ладзіць грамадская культурніцкая кампанія «Будзьма беларусамі!» 25–27 чэрвеня.
Ідэя сёлетняга фестывалю — супастаўленне аўтэнтычнай культуры з сучаснымі тэндэнцыямі. Мы пакажам глыбока архаічнае, неадаптаванае мастацтва і аб’яднаем яго з самым актуальным у творчасці маладых беларусаў. Мы свядома пазбягаем любых рэканструкцый і інтэрпрэтацый. У нас вы ўбачыце людзей, якія «жывуць» культуру, а не гуляюць у яе.
Сучаснага мастацтва не існуе без кіно і тэатра. У праграму ўвойдуць:
– відэа-інсталяцыя: праект фатографа Андрэя Лянкевіча «Беларускае паганства» ў музычным суправаджэнні самага вядомага мінскага ды-джэя Laurel;
DJ Laurel (Лаўр Бержанін) — адзін з самых паспяховых прадстаўнікоў клубнай культуры Беларусі. Лаўр унікальны не толькі тым, што практычна адзіны з прадстаўнікоў беларускіх ды-джэяў гастралюе па лепшых клубах Еўропы, ЗША, але і тым, што не забываецца пра Беларусь і імкнецца развіваць клубную культуру ў сваёй краіне.
Ужо некалькі гадоў музыка актыўна гастралюе па свеце і прывозіць у Мінск найзнакаміцейшых ды-джэяў Заходняй Еўропы, якія выступаюць у Мінску толькі дзякуючы своеасаблівай культурнай місіі Лаўра.
– нон-стоп паказ альтэрнатыўных кароткіх фільмаў, відэафільм пра тур літоўскіх гуртоў Migloko, Suiside Djs у Беларусь, відэа-часопіс «Літоўская праўда». Галоўны мэсэдж фільму: што ж ведаюць пра Беларусь маладыя літоўцы і што ведаюць пра Літву маладыя беларусы;
– флэш-анімацыя пра аўтэнтычныя святы.
Тэатр «Кампанія» прапануе гледачам інтэрактыўнае прадстаўленне аднаго з архаічных абрадаў у сучасным выкананні. Сапраўды, кожны зможа пасля гэтага стаць Скарынам! Гледачам будзе прапанавана паўдзельнічаць разам з майстрамі ў вырабе паперы, як гэта рабілася стагоддзі таму.
І гэта толькі адно з унікальных мерапрыемстваў, якія маюць адбыцца.
У межах фестывалю пройдуць такія майстар-класы, як выраб сакральных лялек, пляценне з чаротавага трыснягу, выраб паперы, архаічныя народныя гульні, арыгінальны бодзі-арт і шмат іншага.
Не прапусціце магчымасць аб’яднаць у сабе гісторыю і сучаснасць!
Будзьма беларусамі! Будзьма разам!
Тэгі: Літва
