Пачалася кампанія па зборы сродкаў на выданне новай кнігі Аляксандра Тамковіча пра эліту беларускага грамадства. Кніга будзе складацца з грунтоўных біяграфічных нарысаў і сотняў рэдкіх фота з сямейных альбомаў .
Усім нам пашанцавала. Цяпер ёсць магчымасць даведацца пра жыццё выдатных людзей сучаснасці, як кажуць, з першакрыніц. У гэтым сэнсе “Мазаіка жыцця” — унікальная кніга, бо дае магчымасць пачуць не тое, што кажуць пра асобаў іншыя, а аповед саміх асобаў.
Менавіта пачуць, бо ў кожным радку гучыць голас не аўтара, а таго, з кім ён размаўляе.
Пранікнёны голас успамінаў. Без пафасу і ўзнёслых эпітэтаў. Голас шчырасці і прастаты.
А яшчэ ў гэтых асобаў ёсць агульная рыса. Нікому з іх жыццё не прыносіла поспех “на блюдечке с голубой каёмочкой”, слава не прыходзіла “па блаце”.
Усяго ў жыцці яны дабіваліся самі. Сваёй працаздольнасцю і мэтанакіраванасцю. Cваім талентам!
Як вядома, слова “мазаіка” паходзіць з латыні і першапачаткова азначала “твор, прысвечаны музам”. Да нас яно дайшло праз італьянскую і французскую мовы. Адно з сучасных значэнняў — “злучэнне разнародных элементаў, стракатая сумесь”, то бок тое, што і ёсць ў кнізе.
Толькі з дабаўленнем мноства біяграфічных момантаў. Момантаў, якіх дагэтуль не ведаў ніхто.
Журналіст і пісьменнік Аляксандр Тамковіч добра вядома сваімі кнігамі (18!), якія можна спампаваць у знакамітай віртуальнай бібліятэцы Kamunikat.
Аляксандр Тамковіч — сябра кіраўніцтва Беларускай асацыяцыі журналістаў, беларускага ПЭН-цэнтра, Саюза беларускіх пісьменнікаў.
Узнагароджаны рознымі прэміямі, у тым ліку дыпломам імя Ю. Захаранкі “З паднятым забралам” і прэміяй імя Алеся Адамовіча Беларускага ПЭН-цэнтра.
Работа над “Мазаікай жыцця” доўжыцца ўжо шмат гадоў, газетныя варыянты нарысаў друкаваліся (і друкуюцца) у штотыднёвіку “Новы час”. Цяпер наспела неабходнасць зрабіць асобную ўнікальную кнігу, якая стане запатрабаванай як у хатніх, так і ў публічных бібліятэках.
Дапаможа гэтаму краўдфандынг.
Падрабязнасці кампаніі, а таксама апісанне ўсіх бонусаў вы можаце знайсці на старонцы праекту на плятформе talaka.by.
