Настольную гульню будуць тэставаць у розных гарадах краіны, а карткі зробяць на аснове дзіцячых малюнкаў.
Стваральнікі настольных гульняў, сярод якіх — вядомая “Мова”, пачалі прасоўваць гульню, дзе ўдзельнікі будуць гуляць за монстраў, што харчуюцца розным смеццем. Пачварак робяць максімальна мілымі, каб гульцы ставіліся да іх не як да страшылак, а як да гадаванцаў.
“Шмат у каго дома жывуць такія монстрыкі. Яны хаваюцца пад ложкам, калі вы засыпаеце, ці крадуць вашыя шкарпэткі. Яны не страшныя, а хутчэй мілыя, мімімішныя, як цяпер кажуць”, — кажа кіраўнік праекта Антон Янкоўскі.
Гулец абірае сабе пачварку, якая харчуецца, да прыкладу, толькі шклом. Яе варта сілкаваць, але не перакормліваць. Паводле задумы, такая гульня мае навучыць дзетак сартаваць смецце і не толькі падчас настольнага спаборніцтва, але і ў кватэры ці хаце: “Калі збор сродкаў добра пойдзе, мы ў кожную скрынку з гульнёй укладзем яшчэ і камплект налепак, каб дзеці і дарослыя маглі наляпіць іх на смеццевыя вёдры дома і завесці сапраўднага смеццевага монстрыка. Таксама будуць адпаведныя кубачкі з малюнкамі і папяровыя футляры для стаканаў. То бок створыцца цэлы комплекс вакол гульні.
У асноўным гульня ствараецца як вясёлы адукацыйны праект для дзетак, але ў групе тэставальнікаў было нямала людзей каля 30, якія з захапленнем гулялі. “Я ведаю бацькоў, якія набываюць настолкі, кладуць сваіх дзетак спаць, а пасля ледзь не да раніцы самі гуляюць. Ужо цяпер шмат хто са знаёмых чакае экамонстраў для сябе”, — прызнаецца Антон.
Ён мяркуе, што гульня з’явіцца ў крамах у канцы гэтага года і, мажліва, не толькі ў Беларусі: “Мы напісалі правілы на беларускай, расійскай і ангельскай мовах, так што пазнаёміцца з імі зможа любы чалавек. Разлічваем, што ёй зацікавяцца ва Украіне і Расіі. Тым больш што там такога кшталту гульняў таксама няма”. Нават у самой краўдкампаніі закладзеная мажлівасць для крам фундаваць на праект і першымі атрымаць дзясяткі скрынак для продажу (а яшчэ налепкі, падзякі і г.д).
Да галоўнай прэзентацыі ў розных гарадах пройдуць сустрэчы з дзецьмі, якія будуць галоўнымі тэставальнікамі і нават стваральнікамі гульні. Каманда арганізатараў будзе збіраць малюнкі монстраў, апрацоўваць іх і друкаваць на картках. А тыя, хто не зможа ўзяць ўдзел у такіх творчых сустрэчах, змогуць даслаць свае шэдэўры на пошту праекта. “Мы тлумачым маленькім, што трэба зрабіць і на што гэта пойдзе, а яны здзіўляюць нас сваёй адказнасцю і творчым поглядам на пастаўленыя мэты”, — прызнаўся Антон.
Такая сустрэча прайшла пакуль толькі ў Горадні, а на гэтыя выходныя адбудзецца ў Мінску. Каманда можа прыехаць у любую частку краіны, калі там знойдуцца аматары настолак ці зацікаўленыя дарослыя: “Нам патрэбная толькі пляцоўка і крыху дапамогі ў арганізацыі ў самім горадзе. Яшчэ мы можам даслаць правілы гульні і карткі, каб людзі паспрабавалі разабрацца самастойна, без нас. Бо мы ж ведаем, як мусіць быць, і можам не заўважыць складанасцяў для простых гульцоў. Так што кожны можа ўвайсці ў нашу каманду тэставальнікаў і палепшыць экамонстраў парадамі”, — адзначыў кіраўнік праекта.
Падчас працы над гэтай гульнёй стваральнікі выпадкова амаль зрабілі яшчэ адну. “У пэўны момант мы прыдумалі так шмат правілаў, што яны маглі заблытаць удзельнікаў. Таму частку выдзелілі ў асобны дадатак “Перапрацоўка”. Гэтая гульня распавядзе дзецям, што адбываецца са смеццем, калі яго збіраюць асобна, куды і як перавозяць і што там далей. Калі краўдкампанія пойдзе добра, мы выдадзім адразу дзве гульні, інакш “Перапрацоўка” выйдзе пазней. Але яна дакладна з’явіцца”, — распавёў Антон.
Няўрымслівая каманда плануе і забаву для самых маленькіх — Экамема. Яе сэнс такі ж, як і ў звычайных мемагульнях, але там асноўнай тэмай будзе экалогія. Экамонстры будуць занадта складаныя для дзетак 3-4 гадоў, а вось пераварочваць карткі маленькія здолеюць.
За праектам можна сачыць тут і тут.
Марыя Грыц
