За летні сезон плануецца выдаць два нумары, паведамляе рэдактар часопіса Сяргей Календа.

«Мы адразу працуем над стварэннем двух нумароў, адзін прысвечаны "Падарожжам і эміграцыі", другі — вайне ва Украіне. Апошнія гады, месяцы, тыдні, рэвалюцыя, каранавірус і вайна, зрабіла мільёны людзей уцекачамі, бежанцамі, людзьмі, якія вымушаныя былі абіраць іншыя краіны для жыцця. Гісторыя кожнага — вартая быць агучанай, прачытанай, бо гэта наш агульны скарб, наш шанец, пачаць вучыцца жыць без вайны і без турмы.

Мы ўжо паспяхова выдалі чатыры нумары: Першы, Цэнзурны, Фантастычны і Калядны, апошні нумар быў разасланы поштаю (а гэта каля 300 асобнікаў) ўсім сябрам, якія калісці ўжо падтрымлівалі часопіс і шчыра ўдзельнічалі ў краўдфандынгу. "Мінкульт — Вірус і Выбары", у друкарні — чакае свайго часу», — піша рэдактар.

Часопіс супраць цэнзуры, супраць любых камітэтаў, якія спрабуюць кантраляваць мастацтва. Тэксты, якія на дадзены момант збіраюцца ў новыя нумары, афіцыйна і празрыста ніхто надрукаваць не можа, гэта гісторыі, якія могуць застацца ляжаць схаванымі ў стале і на дыску, але нам неабходна агучыць і паказаць усім, што і як адбываецца навокал. У кожнага нумара ёсць свой пісьменнік з падвокладкі: Букоўскі з бутэлькай, Хэмінгуэй з кубкам, Філіп Дзік у матрыцы, Джордж Оруэл у балаклаве. На Калядным часопісе Дыкенс напалмам паліць елку: гары яно гарам, як гавораць беларусы.

У «Мінкульта 6 — Падарожжа і Эміграцыя» Даніэль Дэфо сядзіць у чарзе эмігрантаў на выспе Амерыкі, а ў «Мінкульта 7 — Вайна» Тарас Шаўчэнка глядзіць на нас па-філасофску асуджальна і з цеплынёй.

«Мінкульту» патрэбны сродкі, каб надрукавацца і аплаціць працу вярстальніка, дызайнера і рэдактара, а таксама выплаціць ганарары пісьменнікам, якія ўдзельнічаюць у стварэнні часопіса.

Падтрымаць праект можна па спасылцы.