Учора ў Гомельскім абласным судзе пачаўся новы судовы працэс над журналісткай Кацярынай Андрэевай.
Нагадаем: Кацярына была затрымана за стрым падчас акцыі памяці Рамана Бандарэнкі. Яе асудзілі да двух гадоў зняволення. Свой тэрмін Кацярына Андрэева адбывала ў папраўчай калоніі № 4 у Гомелі, ён павінен быў завяршыцца 5 верасня 2022 года.
Але 10 лютага журналістку раптам этапіравалі ў СІЗА Гомеля. Пазней сям’і палітзняволенай стала вядома, што Кацярыне выставілі новае абвінавачванне. Зараз ёй пагражае ад 7 да 15 гадоў пазбаўлення волі.
— Суд будзе праходзіць у закрытым рэжыме, таму, натуральна, нават блізкія не змогуць патрапіць на яго, — распавёў «Народнай Волі» Ігар Ільяш, муж Кацярыны. — Адвакат, які будзе на судзе, таксама не мае права агалошваць нейкую інфармацыю, таму ўсё засакрэчана. Што канкрэтна інкрымінуецца Кацярыне і на падставе якіх падзей узнікла абвінавачванне — не вядома.
Адзінае, што я змагу даведацца, гэта пра дату, калі будзе агалошвацца прысуд. І агалошванне рэзалютыўнай часткі павінна быць адкрытым. Прынамсі блізкія змогуць прысутнічаць. Таксама, напэўна, даведаюся, калі адбудзецца перанос працэсу ці аб’явяць перапынак. А вось іншая інфармацыя — сакрэт. Не зможам даведацца нават пра тое, які тэрмін запросіць бок абвіначвання.
— Якія ў вас прагнозы наконт канчатковага рашэння суда?
— Ніякіх прагнозаў не раблю, бо ў сённяшняй сітуацыі рабіць гэта абсалютна бессэнсоўна. Разумею, што рашэнне будзе прымацца палітычнае, і з досведу справы Каці можна зразумець, што ўсе гэтыя судовыя тэрміны даволі ўмоўныя. У тым сэнсе, што яны могуць як з’явіцца, так і быць скасаваны ў любы момант.
Каця павінна была выйсці на волю ў верасні гэтага года, але ж бачым, што раптоўна ўзнікла новая справа. Таму разважаць пра тое, што гэта будзе за прысуд, які тэрмін можа атрымаць жонка, — гэта тое самае, што гадаць на кафейнай гушчы.
Але я веру, што мы перажывём і гэта. Мы дачакаемся вызвалення Каці, і будзем разам, і будзем шчаслівыя! Гэта ўпэўненасць дае нам сілы трымацца і змагацца.
Сяргей Заблоцкі, «Народная Воля»
