21-22 кастрычніка ў Маладзечне адбудзецца Міжнародная навукова-практычная канферэнцыя “Культурная спадчына роду Агінскіх і яе значэнне для сучаснага развіцця грамадства”, прымеркаваная да 250-годдзя з дня нараджэння выдатнага кампазітара, грамадскага і дзяржаўнага дзеяча Міхала Клеафаса Агінскага.
Канферэнцыя праводзіцца па ініцыятыве Беларускага дзяржаўнага універсітэта культуры і мастацтваў, Маладзечанскага дзяржаўнага музычнага каледжа імя М.-К. Агінскага і Мясцовага дабрачыннага фонда “Спадчына Міхала Клеафаса Агінскага” пры падтрымцы Мінскага абласнога выканаўчага камітэта, Маладзечанскага раённага выканаўчага камітэта, грамадскага аб’яднання “Беларускі фонд культуры”.
На канферэнцыі прагучаць даклады навукоўцаў з Беларусі, Літвы, Польшчы, Расіі, Украіны, а таксама грамадскіх дзеячаў, кіраўнікоў бізнес-структур, выдаўцоў і інш.
У межах канферэнцыі арганізавана праца пленарнага пасяджэння, а таксама чатырох тэматычных секцый: “Грамадска-палітычная і мастацка-творчая дзейнасць роду Агінскіх”, “Матэрыяльная і духоўная спадчына роду Агінскіх”, “Пытанні рэпрэзентацыі гісторыка-культурнай спадчыны М.-К. Агінскага”, “Эпоха М.-К. Агінскага ў каардынатах XVIII-XIX ст.”
Падчас канферэнцыі адбудзецца адкрыццё выставы маладзечанскіх мастакоў і выставы твораў па выніках міжнароднага пленэру, прысвечанага памяці М.-К. Агінскага, канцэрт ансамбля “Класік-авангард”, прэзентацыя новых гістарычных выданняў, краязнаўчая экспедыцыя па гістарычных мясцінах Маладзечанскага і Смаргонскага раёнаў, звязаных з дзейнасцю прадстаўнікоў княжацкага роду Агінскіх і інш.
Мерапрыемства пройдзе на базе Маладзечанскага дзяржаўнага музычнага каледжа імя М.-К. Агінскага (вул. Вялікі Гасцінец, 52).
Край.бай па матэрыялах, прадастаўленых дырэктарам фонда “Спадчына Міхала Клеафаса Агінскага” Аляксандрам Ляшковічам
Фота выкарыстана ў якасці ілюстрацыі. Крыніца: old.rgo.ru
Тэгі: Маладзечна
