Вывучэнне любой мовы — гэта бесперапынны працэс шліфоўкі і адточвання. Хочаш, каб твая беларуская заззяла нібы брыльянт? Тады трымай нашу падборку сэрвісаў, якія палепшаць тваю родную мову!
Skarnik
Мова без слоўніка — не мова. Таму адкрываем нашу падборку адным з анлайн-слоўнікам — Скарніка. Як заяўляюць стваральнікі (ці стваральнік), абнаўленні робяцца штодня, таму база словаў пастаянна павялічваецца і ў сучасным стане. У сэрвісу ўсяго 4 функцыі: рус-бел і бел-рус пераклады, тлумачальны слоўнік і беларуска-рускі транслітаратар імёнаў. А для ўладальнікаў прыладаў на Android была зробленая спецыяльная праграма.
Але ў Скарніку ёсць адзінае “але” — тут выкарыстоўваецца наркамаўка (нармаваная дзяржаўная мова), таму калі вы аматар і прыхільнік класічнага правапісу, вы наўрад ці знойдзеце тут нешта карыснае.
А для астатніх Скарнік — выдатная магчымасць пастаянна правяраць правільнасць напісання сваіх словаў, а таксама добрая база для папаўнення слоўнікавага запасу.
Спасылка
Belazar
Белазар — сапраўдная класіка! Ужо больш за дзесяцігоддзе ён дае нам магчымасць рабіць пераклады вялікіх кавалкаў тэксту рус-бел і наадварот. Дарэчы, аматары лацінкі, для вас тут свята! У Белазары прысутнічае функцыя пераводу кірылічнага правапісу беларускай мовы ў лацінку і наадварот. А сярод агульных фішак можна адзначыць магчымасць спампаваць перакладчык на свой камп’ютар, што дазволіць рабіць пераклады нават без сеціва. Для тых жа, хто любіць мабільнасць, распрацоўшчык запусціў спецыяльны чат-бот у Telegram, які нічым не саступае сваё браўзернай і “настольнай” версіям.
Спасылка
Спасылка на чат-бот у ТГ
Мова Нанова
Курсы беларускай мовы “Мова Нанова” за час свайго існавання сталі сапраўды легендарнай кампаніяй. Але апроч “жывых” курсаў у розных гарадах Беларусі ў іх ёсць свой сайт, які дае карыстальнікам інтэрнэту шэраг магчымасцяў. Напрыклад, кожны панядзелак з 18.30 да 21.00 можна паглядзець жывую трансляцыю мінскіх курсаў гэтай праграмы. Апроч гэтага, ёсць асобныя раздзелы, дзе можна пазнаёміцца з беларускамоўнымі музыкамі і літаратарамі. І гэта яшчэ не ўсё. У асобным раздзеле можна азнаёміцца і павывучаць 145 мінулых заняткаў “Мовы Нанова”. Кожны з іх мае сваю тэму, якая тычыцца розных аспектаў нашага жыцця. Менавіта таму вы хутчэй за ўсё знойдзеце тут нешта цікавае. І калі паглядзець на ўсе гэтыя магчымасці, то становіцца зразумела, што сайт “Мовы Нанова” — выдатны плацдарм па ўдасканаленні і вывучэнні беларускай мовы.
Спасылка
Каляндар ад “Будзьма”
Калі няма часу сядзець за вывучэннем, але ўсё роўна прагнеш падцягваць сваю беларускую, то для ўладальнікаў прыладаў на Android і IOS ёсць спецыяльная мабільная версія календара ад кампаніі “Будзьма беларусамі”. Кожны дзень, літаральна разок зірнуўшы на дату, вы зможаце даведацца новае слова, якое будзе яшчэ і выдатна ілюстраванае! У праграме сабрана больш за 700 ілюстрацый ад мастачкі Дар’і Мандзік, таму вы заўсёды зможаце пабачыць для сябе нешта новае.
Спасылка на Android
Спасылка на IOS
Краіна казак
Завяршае нашу падборку праграма для самых маленькіх беларусаў, якія з дзяцінства маюць жаданне вывучаць родную мову. Гэтая праграма для Android мае цэлы стос розных магчымасцяў для дзіцячага навучання беларускай мове: кнігі, песні, калыханкі, аўдыёказкі, тэксты, мультфільмы і два адукацыйных праекты. Выбар даволі багаты, што дазволіць дзецям і іх бацькам знайсці сабе нешта цікавае. І самы галоўны плюс праграмы — яна абсалютна бясплатная. Таму, бацькі, калі хочаце дапамагчы сваім дзеткам у першых кроках да беларушчыны — “Краіна казак” можа стаць для вас вельмі добрым дапаможнікам.
Спасылка на Android
Глядзі таксама:
Багдан Сакалоў
