Ужо ў другі раз пры падтрымцы кампаніі “Будзьма беларусамі!” у старажытным Быхаве адбыўся фэст альтэрнатыўнай музыкі і паэзіі “Музычная аблога”.
Фестываль пакуль праходзіць у даволі сціслым фармаце музычнай вечарыны ў адной з кавярняў або рэстаранаў Быхава, але арганізатары спадзяюцца ў будучым пашыраць фармат, прыцягваць новых удзельнікаў і гледачоў.Першы, леташні фэст, адбыўся ва ўтульнай быхаўскай кавярні “Нікалас”, а “Музычная аблога-2018” трымала абарону ў рэстаране “Івента”, што месціцца па вуліцы Багдана Хмяльніцкага. Асноўныя ўдзельнікі фэсту не змяніліся з мінулага году – быхаўчанам паказалі свае музычныя і паэтычныя творы Раман Яраш, Юры Несцярэнка, Віктар Сямашка і Кумпанія, Максім Іўкін і “Балцкі Субстрат”. З новых удзельнікаў да вечарыны далучыўся Аляксандр Сташкевіч з Магілёва. Ён, дарэчы, не толькі ўраджэнец Быхава, але яшчэ і праходзіў тут вайсковую службу ў апошнія гады існавання СССР – іграў у ансамблі раскватараванай у горадзе буйной авіяцыйнай вайсковай часткі.
Сваімі думкамі і планамі падзяліўся заснавальнік і арганізатар фестываля “Музычная аблога” Максім Іўкін: “Прыемна, што фэст ужо становіцца традыцыйным, бо, як адзначаюць мясцовыя музыкі, адчуваецца недахоп у такой музыцы ў Быхаве. Сёння тут сабраліся вельмі цікавыя музыканты, некаторыя ўдзельнікі ўпершыню прыехалі. Спадзяюся, традыцыя будзе працягвацца, магчыма, будзе мяняцца фармат, але сама ідэя рабіць фэст альтэрнатыўнай музыкі – яна жывая і дзейсная. Назва “Музычная аблога” ўзнікла таму, што музыкі на першы фэст з’ехаліся з розных рэгіёнаў Беларусі, хоць многія нарадзіліся ці некалі жылі тут, у Быхаве, ды і сам горад славуты сваімі аблогамі. Таму некалькі такіх момантаў супалі і выліліся ў такую назву. Яшчэ хочацца правесці фэст на адкрытым паветры, будзем над гэтым працаваць. Думаю, усё ў нас атрымаецца”.
Застаецца пажадаць поспехаў новаму фэсту і яго ўдзельнікам, а быхаўчанам – новых і незвычайных музычных уражанняў. Ды і ўладам можна параіць звярнуць увагу на такое пачынанне і таксама падтрымаць арганізатараў, бо звычайна невялікія раённыя гарады абдзелены культурнымі імпрэзамі, і гэткая арыгінальная падзея, як фэст альтэрнатыўнай музыкі і паэзіі, магла б стаць мясцовай адметнасцю.
Алесь Сабалеўскі. Фота аўтара.
