Першага красавіка на музычных платформах выйшаў EP «Ahida» ад вядомага беларускага постпанк-дуэта Nürnberg. У новым рэлізе прадстаўлены інструментальныя рэміксы на кампазіцыі з аднайменнага міні-альбома гурта 2023 года, піша reform.news.

Свае інструментальныя версіі кампазіцыі «Pacatak» з «Ahida» прапанавалі ажно трынаццаць музыкантаў: Tomorrows Letters, Chvali, MVLI, pakuty, Metairony, Скубут, DustBowlChampion і іншыя электроншчыкі. Рэміксы на трэкі «Himn», «Pytanni», «Maska» стварылі самі музыкі «Нюнбергу». Па выніку атрымаўся EP для сваіх, і крыху — для іншых.

Над вокладкай для EP працавалі Tомс Калніньш (Toms Kalniņš) і Аляксандра Міхалковіч (Aliaksandra Michalkovič).

Nürnberg — постпанк-музычны дуэт, створаны ў 2016 годзе ў Мінску, Беларусь.

На творчасць гурта ўплываюць дэпрэсія постсавецкіх гарадоў, экзістэнцыялізм, сацыяльныя праблемы ў сучасным індустрыяльным свеце, ціск і стомленасць, але таксама некаторыя істотныя пачуцці, якія робяць нас больш чалавечнымі — здольнасць кахаць і адчуваць спагаду.

Першае дэма дуэта выйшла ў жніўні 2017 года. З гэтага моманту гурт выпусціў тры альбомы, тры EP, мноства сінглаў і рэмікс-альбомаў.

Гурт выступае па-беларуску і з’яўляецца адным з найбольш вядомых постпанкаўскіх беларускіх калектываў. Nürnberg выступаў на буйных еўрапейскіх фестывалях і шоукейсах: «Waves Vienna», «Eurosonic Noorderslag» і «AtlasWeekend Kyiv» і іншых. Летась ён здзейсніў вялікі тур па гарадах Лацінскай Амерыкі, Мексікі і Кітая.

Слухаць EP рэміксаў можна тут.