Магчыма, ужо гэтым летам беларусы змогуць здзейсніць падарожжа па ўнікальнай маляўнічай мясцовасці ландшафтнага заказніка «Азёры» на веладрэзіне або спецыяльным вагончыку.

На яго тэрыторыі рэалізуецца праект экатурызму, дзякуючы якому з'явіцца магчымасць прамчацца па вузкакалейным чыгуначным мосце над возерам, перасекчы пяшчаную выспу і трапіць на Святое балота.

Нядаўна заказніку перадалі чыгунку працягласцю амаль 11 кіламетраў. Калісьці яна належала торфабрыкетнаму прадпрыемству, якое займалася здабычай паліва і дастаўляла яго менавіта па вузкакалейцы. У спадчыну заказніку дастаўся і адзіны ў краіне вузкакалейны мост, які праходзіць над возерам Белае. Яго працягласць – 132 метра.

Як стала вядома, рыхтуюцца распрацаваць маршрут з пяці станцый. Адпраўляцца ў дарогу турысты будуць з пляцоўкі ў раёне санаторыя «Азёры». Тут плануецца аформіць невялікі музей заказніка і сувенірную краму. Далей праезд па мосце праз возера з прыпынкам на «Балотнай» станцыі. Затым – знаёмства з участкам, на якім Котра робіць пятлю. А пасля турыстаў чакае наведванне пясчанай выдмы. Канчатковы ж прыпынак – Святое балота. У часы паўстання 1863 – 1864 гадоў у гэтым месцы праходзілі жорсткія баі паўстанцаў з царскімі войскамі. Паўстагоддзя таму Святое балота было асушана дзеля здабычы торфу. Але пазней тут праводзілася экалагічная рэабілітацыя.

Па словах дырэктара рэспубліканскага ландшафтнага заказніка «Азёры» Дзмітрыя Марозіка, на дадзены момант прапрацоўваюцца два варыянты падарожжа па вузкакалейцы. Адзін з іх на веладрызіне – гэта ўмоўная назва для прылады, створанага на базе ровара і прызначанага для язды па рэйках. Цікава, што перамяшчацца на веладрызіне можна як аднаму чалавеку, так і пары. Усё залежыць ад абсталявання.

Другі варыянт падарожжа – на спецыяльным вагончыку, хутчэй за ўсё, адкрытага альбо часткова закрытага тыпу. Як яшчэ адзін варыянт – на мотадрызіне. У гэтым выпадку можна будзе пасадзіць адразу цэлую групу – да 15 чалавек.