Калі вы раптам яшчэ не вызначыліся, як цікава і з карысцю правесці выходныя, мы падкажам. Выставы, шпакоўнікі, канцэрты, Ночы музеяў, акцыі салідарнасці з беларускімі палітвязнямі, лекцыі — выбірайце мерапрыемствы ў сваім горадзе і на свой густ!
Беларусь
18 траўня — адзначаўся Міжнародны дзень музеяў. З 1977 года з’явілася традыцыя ладзіць з гэтай нагоды адмысловую акцыю — Ноч музеяў, калі экспазіцыі адкрыты для наведвальнікаў да позняга часу. Ноч музеяў — доўгачаканая падзея, да якой кожны музей стараецца падрыхтаваць нешта асаблівае.
У музеях Беларусі будзе адбывацца процьма мерапрыемстваў і на гэтых выходных.
Пра самыя цікавыя з іх распавядаем ў артыкуле Ноч музеяў 2023 у Беларусі: куды схадзіць і што паглядзець. Калі сярод прапанаваных варыянтаў не знайшлося нічога па душы, раім заглянуць ў наш адмысловы тэлеграм-бот «Будзьма разам!», які дапаможа падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Мінск і Мінская вобласць
Pop-up store беларускіх мастакоў у Мінску
У прасторы «Вершы» адкрыўся pop-up store беларускіх мастакоў. Гэта выстава-кірмаш, на якой можна пабачыць графіку і фотаздымкі аўтарства сучасных беларускіх мастакоў, злавіць натхненне і таго-сяго набыць.
Працаваць выстава будзе па 7 чэрвеня.
НОЧ МУЗЕЯЎ У МІНСКУ: ноч пад зорным небам у Азярцы
Абяцаюць эксклюзіўную містычную экскурсію, нечаканыя з’яўленні міфічных персанажаў і полымя ачышчальнага вогнішча. У гэтую ноч сцяжынкі ўздоўж хатаў будуць асвятляць толькі ліхтары.
НОЧ МУЗЕЯЎ У МІНСКУ: у музеі гісторыі беларускай літаратуры з рогу ўсяго многа
Арганізатары абяцаюць насычаную праграму: канцэрты, лекцыі, пазнавальныя гульні, майстар-клас па роспісе сурвэтак і шмат чаго іншага. Завітвайце! Будзе цікава!
Віцебск
Выстава «Abstract» у Віцебску
У Віцебску ў 25-ы раз праходзіць выстава «Abstract», якая збірае творы больш за 30 беларускіх сучасных мастакоў. Прыходзьце паглядзець!
Літва
Вільня
Шпакоўнікі ў Вільні! 18, 19, 20 траўня
«Шпакоўнік» — гэта цыкл музычна-паэтычных сустрэч, натхнёных творчай ініцыятывай актрысы Віленскага старога тэатра Анастасіі Шпакоўскай.
18 траўня, 20.00 — удзельнікі: Алена ЖалудОк (тая самая Шчучыншчына), Алена Зуй-Вайцяхоўская, дуэт «Тапачкіны» і маладая спявачка ATESTA.
19 траўня, 21.00 — сустрэча з KETЭВAH і Аляксандрам Дзянісавым (Дзецюкі).
20 траўня, 20.00 — удзельнікі: гурты «Nakapiano» — акустычны праект беларускага рок-гурта «Naka» і Аляксандр Памідораў.
Месца: тэатральная кавярня «Balkonas», Jono Basanavičiaus g. 13, Vilnius
Фэст студэнцкага кіно «RETROSPECTIVE11» ў Вільні
Тэма сёлетняй эдыцыі — «Жыццё па-беларуску!»
У першы дзень будзе паказ твораў па трох катэгорыях: «Дакументальнае кіно», «Кліп» і «Відэа-арт». У другі — «Ігравое кіно» і «Анімацыя».
Абяцаюць паказы ды выступы спікераў, якія раскажуць пра свой досвед у сферы медыя, падзеляцца інсайтамі і заматывуюць студэнт_ак вывучаць кіно.
Выпадковы канцэрт Аляксандра Памідорава ў Вільні
У нядзелю, 21 траўня, у CreateCulture Space грае выпадковы канцэрт не хто іншы як Аляксандр Памідораў! Абяцае адмысловую праграму з фармаце кватэрніка!
Польшча
Варшава
У суботу, 20 траўня, у Варшаве святкуюць дзень народзінаў Аляксандра Кулінковіча, нязменнага лідара «Neuro Dubel». Адмысловы госць — гітарыст гурта «Нейра Дзюбеля» Уладзімір Сахончык. Ён раскажа, як ствараліся некаторыя вядомыя песні гурта і якім быў дзядзька Саша як асоба і музыка.
Канцэрт да Дня нараджэння Аляксандра Кулінковіча ў Варшаве
Беласток
Андрэй Хадановіч у Беластоку
У суботу, 20 траўня, на заняткі Беларускай суботняй школкі «Родны кут» у Беластоку завітае паэт Андрэй Хадановіч з майстар-класам «Ад верша да песні».
Падчас сустрэчы вы:
даведаецеся сакрэты і лайфхакі, як паэтычныя радкі становяцца музычнымі;
складзеце гарачы хіт-парад вершаў, якія сталі песнямі; пачуеце дэтэктыўную гісторыю «Алесі» Аркадзя Куляшова;
заспяваеце разам сусветныя хіты па-беларуску: «Муры», «Гатэль Беларусь», «Алілуя», «Бел-чырвона-белы вожык-патрыёт» і іншыя.
Уваход вольны, і чакаюць усіх (і тых, хто не ходзіць у школку, таксама)!
Кракаў
«Forum gloriosum Cracovense. Як жыў і гандляваў сярэднявечны кракаўскі рынак»: сустрэча-лекцыя ў Кракаве
У суботу, 20 траўня, беларусаў Кракава запрашаюць на файную лекцыю «Як жыў і гандляваў сярэднявечны кракаўскі рынак» у новую прастору «GUTENBERG CLUB». Тут будуць адбывацца лекцыi i майстар-класы для беларусаў, сустрэчы i кiнапаказы, прэзентацыi беларускiх кнiг.
То ў суботу вы даведаецеся, як жыў, гандляваў, забаўляўся, гарэў і адбудоўваўся гэты незвычайны арганізм — Кракаўскі Рынак. З унікальнымі 3D-рэканструкцыямі і масай іншых ілюстрацый, якія паказваюць Рынак у розных відах у розныя эпохі.
Германія
Берлін
Фэст «Межы» ў Берліне
Гэтымі выходнымі, 20 і 21 траўня, у Берліне адбудзецца фестываль «Межы» — мікс эксперыментальнага відэа-арту і інсталяцый, эмбіенту і інструментальнага джазу, акустыкі і электронікі, Усходняй і Заходняй Еўропы.
Каб даведацца, дзе нашы межы і ці існуюць яны, будзе цудоўная музычная і мастацкая кампанія, у тым ліку Big Bouncing Charlie, MadMappers, Primary Noise, Mufer і іншыя.
Францыя
Тыдзень беларускага кіно ў Францыі
У розны гарадах Францыі пройдуць паказы беларускіх фільмаў! Глядзіце час і адрас на афішы.
21 траўня Дзень палітвязня. Дзе пройдуць акцыі салідарнасці
Праваабаронцы абралі дату Дня палітвязня ў Беларусі невыпадкова. 21 траўня — гадавіна смерці ў калоніі палітзняволенага Вітольда Ашурка.
Каб не прапусціць і даведацца, дзе беларусы ўсяго свету ладзяць акцыі салідарнасці ў падтрымку беларускіх палітвязняў і ўшанаванне памяці Вітольда Ашурка, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Карыстацца ім вельмі проста: выбірайце той ці іншы горад або ўсю краіну, падпісвайцеся асобна на ўсе анлайн-мерапрыемствы ці выбірайце варыянт all inclusive — усе беларускія падзеі свету (у тым ліку і анлайн-мерапрыемствы).
