18 чэрвеня ў Магілеве памёр пісьменнік, выкладчык, шматгадовы старшыня магілёўскай арганізацыі Таварыства беларускай мовы, былы дэкан магілёўскага філфака Яраслаў Клімуць. Пра гэта паведамляе magilev.by.
Яраславу Клімуцю быў 81 год. Ягоныя ўзроставыя хваробы ўзмацніла захворванне на кавід.
Яраслаў Іванавіч Клімуць нарадзіўся ў 1940 годзе на Гарадзеншчыне. Яго праз усё жыццё называлі западэнцам, і гэта было для яго кампліментам. Ён быў самым што ні на ёссць натуральным беларусам. Праз усё жыццё — толькі на беларускай мове, толькі Беларусь. І ён гэтага патрабаваў ад нас, маладых выкладчыкаў. Пры Клімуці было сорамна размаўляць не на беларускай мове, было сорамна не ведаць Быкава, Караткевіча, Купалу, Коласа...
Радзіма Яраслава Іванавіча — вёска Вострава Мастоўскага раёна. Нейкі час служыў у войску. У 1962 годзе паступіў у БДУ, вывучаў беларускую мову і літаратуру. Потым была аспірантура ў Інстытуце літаратуры імя Янкі Купалы Акадэміі Навук. З 1975 года Клімуць працаваў у Магілёўскім педагагічным універсітэце. З 1986 года па 2000 год ён быў дэканам філалагічнага факультэта.
Яраслаў Іванавіч — вядомы літаратуразнаўца. Як пісьменнік-крытык ён пачаў працаваць у 1968 годзе ў раённай газеце «Чырвоная зорка» Уздзенскага раёна Мінскай вобласці. У рэспубліканскім перыядычным друку творы з’яўляюцца з 1972 года. Член Саюза беларускіх пісьменнікаў (1996). Узнагароджаны Ганаровымі граматамі Міністэрства адукацыі Рэспублікі Беларусь (1982, 1998), Саюза беларускіх пісьменнікаў (1999), Дзяржаўнага літаратурна-мемарыяльнага музея Якуба Коласа (2004).
Яраслаў Клімуць — легенда магілёўскага філфака. Кумір усіх студэнтаў 1990-х гадоў.
Як адзначыў на сваёй старонцы ў Фэйсбуку магілёўскі навуковец і грамадскі дзеяч Аляксандр Агееў, «Магілёўшчына згубіла адданага беларускай справе патрыёта, шляхетнага і высакароднага чалавека, абаронцу і будзіцеля беларусаў».
Развітанне х ім адбудзецца 20 чэрвеня ў зале рытуальных паслуг на перакрыжаванні вуліц Чалюскінцаў і Раманава (мікрараён Мянжынка) з 11:00.
