4 красавіка пасля цяжкай хваробы сышоў з жыцця беларускі літаратуразнавец Серафім Антонавіч Андраюк. Пахавалі яго 6-га красавіка. Пра гэта паведаміла на сваёй старонцы ў Фэйсбуку Аксана Спрынчан.
Серафім Андраюк нарадзіўся 10 сакавіка 1933 г. у вёсцы Градзялі Беластоцкага ваяводства (Польшча). У 1945 г. разам з бацькамі пераехаў у в. Бербашы Карэліцкага раёна Гарадзенскай вобл.
Скончыў аддзяленне беларускай мовы і літаратуры БДУ, аспірантуру пры Інстытуце літаратуры імя Янкі Купалы АН БССР. У 1966–1981 г. Быў навуковым супрацоўнікам гэтага інстытута. У 1981–1993 гадах — галоўным рэдактарам, у 1993–1996 гадах дырэктар выдавецтва «Мастацкая літаратура». Кандыдат філалагічных навук. Член СП СССР.
Дэбютаваў у друку як крытык і літаратуразнавец з 1964 г. Друкаваў рэцэнзіі і артыкулы па пытаннях гісторыі беларускай савецкай літаратуры і сучаснага літаратуранага працэсу.
Выдаў манаграфіі «Жыццё. Літаратура. Героі» (1973), «Традыцыі і сучаснасць» (1981), зборнікі крытычных артыкулаў «Вывяраючы жыццём» (1976), «Жыць чалавекам» (1983), нарыс творчасці І. Пташнікава «Чалавек на зямлі» (1988), кнігу «Стыль пісьменніка» (1974).
Лаўрэат Літаратурнай прэміі СП БССР імя І. Мележа (1984) за кнігу «Жыць чалавекам».
На здымку выдавецтва "Мастацкая літаратура" Серафім Антонавіч скрайні справа. 1982 год
