Найперш беларускамоўны лекторый распавядзе пра оптыку.
У гарадах усё папулярнейшымі робяцца лекторыі, дзе навукоўцы на пальцах тлумачаць нейкія фундаментальныя з’явы. Натуральна, што і ў Мінску ёсць шэраг такіх суполак, але на мове пра электрычнасць ці чорныя дзіры можна пачуць толькі на сустрэчах Папулярнай навукі па-беларуску.
“Знайсці лектара складана. Нашы лекцыі бясплатныя, а падрыхтаваць 40-хвілінны выступ няпроста для навукоўца. Так што часам, калі не знаходжу навукоўца, то рыхтуюся і выступаю сама”, — прызналася арганізатар курсаў і выпускніца факультэта радыёфізыкі і камп’ютарных тэхналогій БДУ Анастасія Палтаржыцкая.
Ідэя такога лекторыя з’явілася летась, з яе рэалізацыяй дапамаглі вядоўцы Мова.ТУТ. Першая лекцыя была прысвечаная малекулярнай фізіцы, дзе пасля тэарэтычнай часткі выступілі супрацоўнікі мінскага музея навукі. Яны паказвалі розныя дзівосы з вадкім азотам, разбівалі ружы і іншым чынам здзіўлялі людзей.
Пасля былі самыя разнастайныя тэмы: электрычнасць, магнетызм, нябесная механіка і нават кажаны. У канцы лекцый ладзяць практычныя вопыты ці нейкія гульні. Часам дапамагалі аднакурснікі Анастасіі, самі шукалі апаратуру ва ўніверсітэце, каб правесці доследы перад аўдыторыяй. “Да нас прыходзяць і малыя дзеці з бацькамі, і людзі сталага веку, так што зладзіць занятак, каб усім было цікава, складана. Таму і гуляемся, каб ніхто не заснуў”, — распавяла Анастасія.
Цяпер на старонцы праекта можна паглядзець здымкі з лекторыяў і пачытаць пра навукоўцаў, якія хоць неяк звязаныя з Беларуссю. Гаворка не толькі пра тэхнічныя навукі, але і пра навуку прыгожага.
Цікава, што на папулярны лекторый “Курылка Гутэнберга” месцы распісваюць за некалькі дзён, а колькасць наведнікаў Навукі па-беларуску вагаецца ад 10 да 30 чалавек. Анастасія перакананая, што рэч тут не ў мове: “Пра лекторыі ў нас пакуль ведае не так шмат людзей. Мажліва, тут справа ў неразрэкламаванасці нашых курсаў. Але тыя, хто прыходзіць, пасля задаюць пытанні, цікавяцца тэмай далей”.
Кінуць ладзіць лекторыі Анастасія ніколі не хацела: “Вядома, было крыўдна, калі ты рыхтуешся, а ніхто не прыходзіць. Але тады я думала, што варта памяняць, каб прывабіць і зацікавіць слухачоў. А калі ў канцы вечара падыходзяць людзі і кажуць “дзякуй” — гэта для мяне найлепшы стымул”
Анастасія прыдумала закрануць з гэтага сезону новыя сферы: матэматыку і генетыку, мажліва, будуць і гуманітарныя навукі кшталту права. Яшчэ з’явіцца канал на Ют’юбе, дзе арганізатарка выкладзе відэа з лекцый, “каб людзі ведалі, як у нас цікава”.
Таксама наведнікі пасля кожнай лекцыі будуць атрымліваць раздаткі са сціслым зместам тэмы ці асноўнымі формуламі. “Я буду клапаціцца пра якасць заняткаў. Праз тое, што прыходзяць людзі з рознай адукацыяй, істотна, каб яны маглі атрымаць апорны матэрыял, прыйсці дадому і ўспомніць ды распавесці сваякамі пра лекцыю і новыя веды. Я хачу, каб яны атрымлівалі як мага больш карысці, нават калі ў групе будзе толькі 10-15 слухачоў”, — адзначыла Анастасія.
Канкрэтнай даты пачатку лекторыя пакуль няма, за навінамі праекта можна сачыць на яго старонцы.
Марыя Грыц
