Люты нам прынес не толькі адлігу і пах вясны, але і новыя імпрэзы, новых сяброў.
Так, 2 лютага ў галерэі мастацтваў г. Бяроза адбылася знакавая падзея – адкрыццё пастаяннай літаратурнай экспазіцыі “Вытокі літаратурнага майстэрства”. Бярозаўская зямля шчодрая на таленты. Адна толькі вёска Сялец, у якой нарадзіўся Алесь Разанаў, дала беларускай культуры і драматурга Міколу Арахоўскага і пісьменніка Віктара Супрунчука і краяведа Міколу Пейгана. Вось такая бярозаўская анамалія!
Значны ўнёсак не толькі ў нацыянальную, але і сусветную культуру ўклалі лаўрэаты нацыянальных і еўрапейскіх прэмій Алесь Разанаў і Ніна Мацяш. Нобелеўская лаўрэатка Святлана Алексіевіч таксама напачатку сваёй журналістскай дзейнасці працавала ў раённай газеце “Маяк камунізма”. Аматарам літаратуры добра вядомы імёны Раісы Баравіковай і Зінаіды Дудзюк, Віктара Супрунчука і Васіля Сахарчука, Сяргея Амельчука і Валянціны Осіпавай. На стэндах былі творы і мясцовых літаратараў: Маргарыты Гаравой і Марыі Стэфанавай, Алены Ўсцілоўскай і іншых маладых творцаў, якія яшчэ знаходзяцца ў натхнёным палёце да сваіх вяршыняў.
На літаратурнай экспазіцыі прадстаўлена творчая дзейнасць вядомых беларускіх журналістаў, якія нарадзіліся на Бярозаўшчыне. Сярод іх імёны Андрэя Юдчыца, які доўгі час быў рэдактарам “Народнай газеты”, Анатоля Казловіча – карэспандэнта і пісьменніка-публіцыста, аўтара шматлікіх кніг і дакументальных кінастужак.
Не абдзялілі ўвагай і летапісцаў роднага краю: на стэндах прадстаўлены творы Міколы Пейгана, Міколы Жуковіча, Яўгена Сялені, заслужанага дзеяча культуры БССР Міхаіла Шыманскага і іншых мясцовых краяведаў.
На ўрачыстае адкрыццё літаратурнай выставы сабралася каля сотні гасцей. Было шмат навучэнцаў мясцовых школ. Прыехалі родзічы і сябры дзеячаў культурнага мастацтва. Нягледзечы на вялікую занятасць, на запрашэнні землякоў заўсёды шчыра адклікаецца Алесь Разанаў, які ў якасці ганаровага госця прысутнічаў на імпрэзе. Алесь Сцяпанавіч падзяліўся ўспамінамі пра начатак сваёй творчай дзейнасці ў літаратурным аб’яднанні “Крыніца”, падарыў музею новыя кнігі.
Кампанію “Будзьма беларусамі!” і Саюз беларускіх пісьменнікаў на свяце творчага Слова прадстаўляла намеснік абласнога аддзялення СБП Валянціна Осіпава. Яна павіншавала ўсіх прыхільнікаў нацыянальнай культуры са значнай падзеяй і ўручыла гасцінным гаспадарам свята памятныя сувеніры і беларускія часопісы; таксама выразіла надзею, што літаратурны куток пры галерэі мастацтваў стане кропкай прыцягнення для новых талентаў. Паэтка распавяла слухачам пра дзейнасць Саюза беларускіх пісьменнікаў і кампаніі “Будзьма беларусамі!” і запрасіла мясцовых аматараў паэзіі дасылаць свае творы на сайты часопісаў “Жырандолі”, “Дзеяслова” і “Літаратурнай Беларусі”. Потым прачытала нізку вершаў-прысвячэнняў творцам. Госці актыўна знаёміліся з экспанатамі літаратурнай экспазіцыі, дзяліліся ўражаннямі, выказвалі шчырую ўдзячнасць арганізатарам літаратурнай выставы.
А 5 лютага ў бібліятэцы №16 адбыўся выступ тэатрыка “Лямцавая батлейка”, які ў межах кампаніі “Будзьма беларусамі!” паказаў спектакль “Мама Му паранілася”, паводле кнігі шведскай пісьменніцы Юі Вісландэр у перакладзе Надзеі Кандрусевіч, выдавецтва “КОСКА”.
Як заўсёды, напачатку мы паўтарылі некаторыя беларускія словы. А потым Мама Му пайшла гуляць па лузе, спрабавала (няўдала) пераскочыць агорджу, Крумкач уявіў сябе доктарам, з’еў марозіва, але замест прынес Маме Му замарожаны шпінат. Усё скончылася добра! Дзеткі смяяліся, дапамагалі героям, узгадвалі свае ранкі і спосабы лячэння.
Напрыканцы гледачы паабяцалі ўзяць у бібліятэцы ўсе кніжкі з серыі пра Маму Му.
Гэтым жа днём у мінскай гімназіі № 40 адбыўся незвычайны ўрок беларускай літаратуры. Правесці яго да навучэнцаў 7-х і 11-х класаў запрасілі барда, пісьменніка, перакладчыка, навукоўца Сержа Мінскевіча. Урок быў прымеркаваны да тыдня беларускай мовы і літаратуры і праходзіў у цудоўнай аўдыторыі імя Янкі Лучыны. Спачатку самі вучні пазнаёмілі сваіх калег з творчасцю і працай госця. Спадар Серж распавёў пра беларускую літаратуру канца ХХ – пачатку ХХІ ст. А затым прапанаваў вучням … адправіцца ў паход. Безумоўна, паход уяўны – адчуць сябе вандроўнікам дапамагалі турысцкія песні госця. Гучалі спевы пра падарожжа, прывал, лясное вогнішча, зоры над кацялком з булёнам… Імпрэза праходзіла ў межах кампаніі “Будзьма беларусамі!” Напрыканцы яе – гімназісты і госць зрабілі на памяць пра цёплую сустрэчу агульнае фота.
P.S. Калі Вы жадаеце зладзіць цікавую сустрэчу з ГКК “Будзьма беларусамі!” і ГА “Саюз беларускіх пісьменнікаў” у сваёй мясцовасці, пішыце на скрыню: stasyaky88@gmail.com – будзем рады новым сябрам!
