28 лютага спаўняецца пяць гадоў, як на свет з’явілася першая беларуская настольная гульня “Паўстанцы”. Тады, у 2013 годзе, яна зрабілася сапраўдным вынаходніцтвам і задала добрую хвалю з’яўлення шэрагу новых беларускіх настольных гульняў. Які шлях прайшла гульня за пяць гадоў і які яе далейшы лёс – на гэтыя пытанні мы пагутарылі з яе аўтарам Антонам Янкоўскім.
– Антон, давайце ўспомнім, як пяць гадоў таму з’явілася гульня, якія першыя ўражанні былі ад яе выпуску.
– Уражанні станоўчыя, бо на прэзентацыях і ў Гародні, і ў Мінску збіралася вялікая колькасць людзей. Беларусы сустрэлі гульню вельмі цёпла. Нам гэта было асабліва прыемна, бо ідэя, якая ўзнікла з жарту і жадання зрабіць нешта адметна беларускае, вылілася ў паспяховы праект. Вельмі было прыемна, што да “Паўстанцаў” адчувалася цікавасць як з боку моладзі, так і з боку старэйшага пакалення.
– Чаму была такая цікавасць, як лічыце?
– Па-першае, гэта было нешта новае. Прынамсі, да нас настолак на беларускай мове яшчэ ніхто не ствараў. Па-другое, вельмі добра была выбраная тэма гульні, ці, як модна казаць у коле настольшчыкаў, добра падабраны сэтынг. Паўстанне 1863 года – адметная дата ў гісторыі нашай краіны. Тут было многа патрыятызму, але таксама і “здрадніцтва”, што стала галоўным у нашай гульні. У 2013 годзе мы трапілі ў вельмі пазітыўную хвалю з нашым праектам.
– Ведаю, што гэтая гульня стала знакавай асабіста для вас. Раскажыце, што адбывалася ў вашым жыцці ў той час.
– Сапраўды знакавая, калі так можна сказаць. “Паўстанцы” задалі кірунак новаму этапу ў нашым жыцці, якое мы з жонкай з таго часу звязалі з настольнымі гульнямі. Натхнёныя паспяховым праектам, мы адкрылі ў Гародні краму настолак, арганізавалі свой фестываль, а цяпер зноў вярнуліся да стварэння ўласных праектаў. Цягам апошніх гадоў з камандай сяброў мы выпусцілі некалі новых цікавых настольных гульняў і не збіраемся на гэтым спыняцца.
– Ведаю, што тыраж “Паўстанцаў” даўно скончыўся. Які лёс далей чакае гульню?
– Гульню чакае перавыданне. Сёлета выйдзе новы тыраж “Паўстанцаў”, дзе яны будуць абноўленыя і аздобленыя цікавымі дадаткамі. Чакаецца новы дызайн, новы фармат картак і каробкі. Мы стварылі да гульні дадатак “Зброя-Праклён”, які зробіць яе больш дынамічнай. Будзем вельмі намагацца, каб абноўленых “Паўстанцаў” аматары настольных гульняў і беларускай гісторыі пабачылі да канца вясны. Нецярплівым хочам нагадаць, што за развіццём праекта можна сачыць у сацыяльных сетках.
– Вы казалі, што рыхтуеце новыя праекты. Ці можаце падзяліцца, што гэта будзе?
– Мы плануем выдаць некалькі простых і вясёлых гульняў – драўляных і картачных. Самае цікавае, чым хацелася б пахваліцца, – гэта тое, што акрамя “Паўстанцаў” мы рыхтуем яшчэ цэлыя два гістарычныя праекты. Пакуль яны на стадыі распрацоўкі і тэставання, пошуку дызайну. Нават іх назвы яшчэ канчаткова не зацверджаныя, але ўжо цяпер скажам, што вельмі многа ўвагі надаем гэтым праектам. Гэта будуць гульні, звязаныя з найбольш важнымі датамі беларускай гісторыі, а таксама з друкарствам.
– І апошняе пытанне: за гэтыя пяць гадоў пэўна здаралася шмат цікавых гісторый, звязаных з вашымі “Паўстанцамі”. Ці можаце што-небудзь успомніць?
– Так, канечне, было вельмі многа цікавых сітуацый, асабліва ў час гульняў. Так, напрыклад, у Мінску на прэзентацыі “Паўстанцаў” першым “павесілі” Каліноўскага, бо гулец, які атрымаў картку гэтага персанажа, размаўляў па-руску. А таксама мы з жонкай заўсёды згадваем гісторыю, як пяць гадоў таму напярэдадні ўласнага вяселля ўсе сабраныя на яго грошы аддалі на выданне нашай першай гульні. Гэта была даволі сур’ёзная авантура, але пасля таго як усё атрымалася, дакладна ведаем (і іншым можам параіць): калі вы ўпэўненыя ў сваёй справе – рызыкуйце, таму што гэта таго каштуе.
