У большасці прывабных сярод турыстаў гарадоў свету ёсць пазбаўленыя аўтамабільнага руху вуліцы з вялікай колькасцю бараў, кавярняў і іншых забаўляльных установаў. Там заўжды можна сустрэць вулічных музыкаў, мастакоў, гандляроў сувенірамі, якія напаўняюць гэтыя месцы асаблівымі вайбам ды прыцягальнасцю. На пешаходках, ці больш слушна па-беларуску пагулянках, месцічы ды госці заўжды маюць добрую магчымасць адчуць атмасферу, настрой горада ці проста адпачыць. Беларускія гарады не з’яўляюцца выключэннем, і ў нас кожная пешаходка пазнавальная ды мае свае асаблівасці. Сёння прапануем павандраваць па найбольш вядомых і добраўпарадкаваных пад патрэбы турыстаў пешаходных вуліцах Беларусі.
34travel.me Вуліца Савецкая, Гродна
Гродна
Пачнём наш агляд пешаходак з першага па колькасці захаваных гісторыка-культурных каштоўнасцяў у Беларусі горада. Вядома, размова вядзецца пра старажытны Гарадзень, Гародню, Горадню — ці Гродна. Тут месціцца адна з самых знакамітых і любімых сярод турыстаў пешаходных вуліц Беларусі, якая сёння мае назву Савецкая. У кожны гістарычны перыяд вуліца мела адрозныя назвы: Віленская, Саборная, Дамініканская і інш.
34travel.me Вуліца Савецкая, Гродна
Сёння пешаходка працягласцю паў-кіламетра — бадай, самае папулярнае сярод турыстаў месца ў горадзе. Усім гасцям ды месцічам Гродна добра вядомы пазнавальны гранітна-бетонны брук на Савецкай у выглядзе рознакаляровых бетонных чатырохкутнікаў, пакладзены яшчэ ў 1938-1939 гг., як кажуць гарадзенцы, «за польскім часам».
Вуліца амаль захавала свой гістарычны выгляд, тут можна пабачыць вялікую колькасць будынкаў ХІХ — пачатку ХХ стагоддзя пабудовы. Шмат памяшканняў здадзены пад кавярні ды рэстарацыі.
Чытайце па тэме:
Ад старажытнай царквы да «міні-зыбіцкай». Што варта паглядзець у Гродне на выходныя
Пінск
Далей рушым у сталіцу Палесся, горад Пінск, другі горад пасля Гродна, па колькасці захаваных гісторыка-культурных каштоўнасцяў.
Тут ажно некалькі пешаходак, на вуліцы Першамайскай і Леніна. Большай па працягласці, ажно 800 метраў, і найбольш старажытнай з’яўляецца вуліца Леніна.
За час свайго існавання вуліца змяніла шмат назваў: Вялікая Спаская, Францішканская, Вялікая Кіеўская, Касцюшкі і інш. Тут можна пабачыць добра захаваныя будынкі ХІХ — пачатку ХХ стагоддзя.
Пінск, вуліца Леніна. Фота: 34travel.me
Сёння апроч таго, што вуліца Леніна шчодра аздоблена наяўнасцю разнастайных кавярняў ды рэстарацый, тут варта звярнуць увагу на «Пінскі мур» — палац Бутрымовіча, бадай, найстарэйшы будынак у Пінску. У ім цяпер месцяцца ЗАГС і частка экспазіцыі Музея беларускага Палесся, прысвечаная вядомым мясцовым шляхецкім родам: Ордаў, Бутрымовічаў, Скірмунтаў.
Пінск. Вуліца Леніна. Фота: belarus.travel
Барочны касцёл Унебаўзяцця Найсвяцейшай Панны Марыі з адным з самых вялікіх і старадаўніх арганаў у Беларусі знаходзіцца менавіта на гэтай вуліцы Пінска. У касцёле часта адбываюцца музычныя імпрэзы, да таго ж арган можна пачуць і падчас нядзельнай імшы. Яшчэ ў бажніцы варта звярнуць увагу на знакаміты абраз «Пінскай Мадоны», знешні выгляд якой быў спісаны ў ХІХ стагоддзі з аблічча простай пінчанкі выбітным беларускім мастаком Альфрэдам Ромэрам.
Чытайце па тэме:
Топ-7 помнікаў ад «Будзьма!», якія варта наведаць у Пінску
Брэст
Далей рушым, бадай, на самую вядомую сярод турыстаў пешаходку Беларусі — у Берасце, ці Брэст. Сёння вуліца мае назву Савецкая, але раней звалася Мільённай, Паліцэйскай, Дамброўскага, Шаўчэнкі, Генералштрасэ і інш. Сярод усіх падобных вуліц Беларусі, берасцейская пешаходка вылучаецца сваёй працягласцю, ажно 1700 метраў, і разнастайнасцю інфраструктуры. Тут можна сустрэць вялікую колькасць крам, гандлёвыя цэнтры, і вядома, кавярні ды рэстарацыі.
Брэст, вуліца Савецкая. Фота: belarus.travel
Увечары ў цёплае надвор’е тут можна сустрэць вулічных музыкаў, якія збіраюць вакол сябе безліч слухачоў, што стварае непаўторную творчую атмасферу. Фантанам і ўпарадкаванымі клумбамі ў Беларусі ўжо таксама нікога не здзівіць, але тут усё гэта таксама да месца. Будынкі паабапал вуліцы вельмі ахайна адрэстаўраваныя, і нават сучасная забудова ўважліва схаваная за імі і не псуе агульнага аблічча цэнтральнай артэрыі турыстычнага Брэста. А мясцовым цудам, паглядзець на які ў Брэст прыязджаюць тысячы наведвальнікаў, з’яўляецца сапраўдны ліхтаршчык, які на працягу ўжо трыццаці год кожны вечар запальвае гарадскія ліхтары.
Брэст, вуліца Савецкая, ліхтаршчык. Фота: strada.by
Віцебск
Наступная пешаходка, якую варта наведаць — вуліца Суворава (гістарычная назва Узгорская) у Віцебску працягласцю 1300 метраў. На самым пачатку шпацыру па ёй варта звярнуць увагу на ўнікальную архітэктурную каштоўнасць, мясцовую ратушу — адзін з нешматлікіх сімвалаў гарадскога самакіравання, які захаваўся ў Беларусі ў аўтэнтычным выглядзе.
У будынку зараз месціцца Віцебскі абласны краязнаўчы музей, і любы жадаючы можа ўзняцца на вежу ратушы, каб пабачыць адну з найлепшых панарамаў горада.
Віцебск, вуліца Суворава. Фота: planetabelarus.by
Вуліца поўніцца вялікай колькасцю кавярняў, рэстарацый ды іншых турыстычных радасцяў, некаторыя з іх месцяцца ў гістарычных будынках. Збольшага на вуліцы можна пабачыць забудову канца ХІХ — пачатку ХХ стагоддзя, але можна сустрэць і гандлёвыя шэрагі, узведзеныя на стагоддзе раней. Архітэктурнай дамінантай вуліцы з’яўляецца адноўленая Свята-Уваскрасенская царква ў стылі віленскага барока, што была знішчана савецкімі ўладамі ў 1936 годзе.
Магілёў
У Магілёве для пешых шпацыраў аддадзена цэнтральная частка вуліцы Ленінскай. У розныя гістарычныя перыяды яна мела назвы: Ветраная, Вялікая Садовая, Інжынерная і інш. Тут захавалася вялікая колькасць будынкаў ХІХ стагоддзя — гэта колішнія банкі, гатэлі, крамы.
Магілёў, вуліца Ленінская. Фота: vestnikmogileva.by
Менавіта на Ленінскай знаходзіцца ўпадабаная турыстамі плошча Зорак, дзе можна пабачыць своеасаблівую «алею славы» з імёнамі ўшанаваыных дзеячаў, што зрабілі свой унёсак у гісторыю музыкі, навукі, спорту.
Тут жа размешчаны і адзіны ў Беларусі помнік зорніку з тэлескопам. Яшчэ па вуліцы Леніна месціцца музей Бялыніцкага-Бірулі і Музей гісторыі горада (у будынку адноўленай ратушы), якія таксама абавязкова варта наведаць.
Язэп Вараніцкі, budzma.org
Чытайце яшчэ:
Тэст: пазнай горад па ратушы
