29 красавіка 2012 г. у Доме-музеі Адама Міцкевіча ў Наваградку адбыўся чарговы выступ у межах музычна-асветніцкага праекта “Песні філаматаў і філарэтаў”, што ажыццяўляецца пры падтрымцы грамадска-культурніцкай кампаніі “Будзьма беларусамі!” і МГА “Гісторыка”. Гэтым разам імпрэза была прысвечаная памяці слыннага беларускага філосафа, гісторыка, літаратуразнаўцы Уладзіміра Міхайлавіча Конана (1934-2011), якому 23 красавіка споўнілася б 78 гадоў.

У.Конан нарадзіўся на хутары Плянта блізу в. Вераскава Навагрудскага раёна і дзякуючы плённай навуковай дзейнасці з выразным беларусацэнтрычным характарам заняў годнае месца ў шэрагу выбітных ураджэнцаў Наваградчыны, сярод якіх і актыўныя ўдзельнікі таемных студэнцкіх таварыстваў філаматаў і філарэтаў А.Міцкевіч, Я.Чачот, І.Дамейка.  У сваіх даследваннях У.Конан надаваў належную ўвагу поглядам і творчасці лідэраў філамацкага руху, якія фактычна стаялі ля вытокаў беларускага нацыянальнага адраджэння.

Імпрэза ладзілася пры ўдзеле Навагрудскага гісторыка-краязнаўчага музея і Навагрудскай цэнтральнай раённай бібліятэкі, якая падрыхтавала міні-выставу кніжных выданняў У.Конана.

Успамінамі пра У.Конана падзяліліся дырэктар Дома-музея А.Міцкевіча Мікалай Гайба, калегі і землякі выдатнага філосафа, прафесары Беларускага дзяржаўнага ўніверсітэта культуры і мастацтваў – доктар філасофскіх навук Энгельс Дарашэвіч і доктар філалагічных навук Аляксей Рагуля, стрыечная сястра Раіса Іосіфаўна. Прысутныя таксама паглядзелі дакументальны фільм кінастудыі “Летапіс” пра У.Конана “Згадкі страчанага раю”.

доктар філасофскіх навук Энгельс Дарашэвіч

доктар філалагічных навук Аляксей Рагуля

У выкананні А.Жбанава прагучалі пры падтрымцы публікі песні на словы А.Міцкевіча, Я.Чачота, Т.Зана, А.Адынца з нотнага сшытка Б.Свентажэцкай, знойдзенага ў віленскім архіве музыказнаўцам С.Немагай.

“Песню Марылі” (яе, па ўспамінах сучаснікаў, часта напявала каханая А.Міцкевіча Марыля Верашчака) у самабытнай манеры праспявала Раіса Крывальцэвіч.

Раіса Крывальцэвіч выконвае “Песню Марылі”

Было і традыцыйнае малако – сімвал праўды і чысціні ў філамацкай моладзі.

На вялікім экране дэманстраваліся выявы вядомых філаматаў і філарэтаў, іх выкладчыкаў, фотаздымкі розных мясцін, звязаных з іх жыццём і творчасцю, у Беларусі і іншых краінах.

Напрыканцы сустрэчы прадстаўнікі Фонда імя М.К.Агінскага, якія адмыслова завіталі ў Наваградак з Маладзечна, распавялі пра мэты і напрамкі дзейнасці сваёй арганізацыі, а наваградская паэтка Святлана Абдулаева прачытала цудоўны верш, які нібыта падсумаваў усё прамоўленае да гэтага.

наваградская паэтка Святлана Абдулаева

Пасля завяршэння імпрэзы госці з Мінска выправіліся ў вёску Вераскава, дзе адведалі магілу маці У.Конана Сафіі Якаўлеўны, зазірнулі ў мясцовую блібліятэку, сустрэліся з вясковай інтэлігенцыяй і сваякамі філосафа.

Тэгі: Наваградак