Напярэдадні першага вясновага анлайн-канцэрту ад кампаніі «Будзьма!», які адбудзецца ўжо заўтра, публікуем адказы Піта Паўлава на пытанні нашай анкеты ў якіх ён напоўніцу раскрываецца, як творца.
1. Хто вы па жыцці?
Піт Паўлаў — музыка
2. Кім марылі быць у дзяцінстве?
Першая ўсвядомленая мара — танкістам. А пасля не было такіх дакладных. Былі сітуатыўныя.
3. Калі б была магчымасць карэнным вобразам змяніць жыццё ці скарысталіся вы б ёй і як?
Не. Мяне цалкам задавальняе накірунак майго жыцця. Некаторыя працэсы б паскорыў, рацыяналізаваў, дэлегаваў бы нейкія абавязкі.
4. Ваша жыццё — гэта толькі ваша прафесія, ці ёсць яшчэ інтарэсы, якія?
Я не ведаю. Музыка — гэта не прафесія (у мяне няма прафесіі). Тут усё звязана. Некаторыя знаёмыя нават абвінавачваюць у такім «куркульстве»: дзе б ні быў, што б не бачыў, адразу прымяраю, а як бы гэта гледзелася ў кліпе, прагучала, як можна выкарыстаць у музыцы...
Я спартовец. Я радыёінжынер па адукацыі. Быў час, калі я аддана працаваў у гэтым кірунку. Малюю, яшчэ. Сачу за сучасным выяўленчым мастацтвам.
5. Як пачынаецца ваш ранак?
Зранку амаль абавязковыя практыкаванні. Сняданак. Зараз з’явілася новае: штодня зранку працую над падтрымкай і развіццём сваіх навыкаў — праігрываю некаторыя рэчы, каб спалучыць лёгкасць і дакладнасць выкананння.
6. Што/хто вас натхняе?
Усё натхняе. Людзі. Мастацтва. Мае калегі. Больш за ўсё — пісьменнікі. Апошнім часам — серыялы, кіно.
7. Як вы адпачываеце?
Вандрую.
8. Назавіце найбольш значныя для вас кнігі, фільмы, музыку
За апошні час уразіла кніга Альгерда Бахарэвіча «Сабакі Эўропы» — нечакана і вельмі прыемна. Увогуле, спіс кніг «майго жыцця» будзе за сотню твораў...
1-я кніга — «Урфін Джус і яго драўляныя салдацікі». Таксама зачытана «да дзірак»: «Вершнік без галавы», «Тры мушкецёры».
Вельмі важныя — «Майстар і Маргарыта», «12 крэслаў» — яны акрэслілі маю мову, пачуццё гумару, ступень іроніі.
У юнацтве «выбухнуў» Караткевіч. Першы яго твор я прачытаў з ксеракопіі з нейкага часопіса. Гэта быў «Чорны замак Гальшанскі» — прачытаў за вечар і ноч. Чытаю Глобуса, Пелевіна, Сарокіна, Даўлатава, Бітава, Уліцкую.
9. Як паўплывалі на вас падзеі жніўня 2020 года?
Ніяк. Дадалі вельмі моцна любові да нашых людзей
10. Беларусь вашай мары — якая яна?
— з адчыненымі межамі
— з вольнымі выбарамі
— цалкам падкрэсліваецца суверэнітэт і незалежнасць
— адчыненая ва ўсе бакі, дабразычлівая
— перад усім права — перад усім інтарэсы чалавека: калі я правы, хачу, каб былі механізмы дамагчыся справядлівасці
Найперш — вольная і справядлівая
Далучайцеся да анлайн-канцэрта на нашым ютуб-канале 15 красавіка а 19-й гадзіне!
