Выпускнікоў вышэйшых навучальных устаноў платнай формы навучання прапанавала размяркоўваць на працу старшыня Савета Рэспублікі Наталля Качанава.
Раней прымусовае размеркаванне тычылася толькі студэнтаў бюджэтнай формы навучання. «Міністэрству адукацыі, ВНУ пастаўлена задача размяркоўваць не толькі тых, хто навучаўся на бюджэтнай аснове, а размяркоўваць усіх», — заявіла Качанава. На яе думку, выпускніку ВНУ дзяржава павінна прадаставіць першае месца працы. Зацікавіць маладых спецыялістаў плануюць выдачай арэнднага жытла ці месца ў інтэрнаце.
Зараз выпускніку, які вучыўся на бюджэтнай форме адукацыі, трэба адпрацаваць два гады па размеркаванню. Калі вучоба ажыццяўлялася па накіраванню пэўнай установы — 5 год. Пазбегнуць размеркавання можна пайшоўшы ў войска, сплаціўшы поўны кошт навучання або пайшоўшы ў дэкрэтны адпачынак. Таксама можна паступіць у магістратуру і аспірантуру, але потым усё роўна прыйдзецца адпрацоўваць.
Беларусь — адзіная краіна ў Еўропе, дзе ёсць абавязковае размеркаванне пасля атрымання вышэйшай адукацыі.
