Кампанія салідарнасці «Філосаф у турме» распачала збор подпісаў інтэлектуалаў, дзеячаў культуры і прадстаўнікоў акадэмічнай супольнасці пад адкрытым лістом па справе Уладзіміра Мацкевіча да мінскага гарадскога суда з патрабаваннем адкрытага і аб’ектыўнага судовага працэсу.
«Уладзімір Мацкевіч — філосаф, метадолаг, мысляр, грамадскі дзеяч. Ягоныя тэксты з’яўляюцца здабыткам айчыннай і еўрапейскай культуры і гуманітарнай навукі. Як філосафа і метадолага яго ведаюць у шмат якіх краінах, яго актуальныя напрацоўкі стымулююць дыскусіі і развіццё філасофскай і навуковай думкі, — пішуць аўтары зварота пра Уладзіміра Мацкевіча. — Як грамадзянін Уладзімір Мацкевіч з’яўляецца адным з самых паслядоўных абаронцаў незалежнасці і суверэнітэту Беларусі, вядомы сваёй прыхільнасцю да дэмакратычных каштоўнасцяў і грамадскага дыялогу — спосабу грамадскага і палітычнага ўзаемадзеяння, вырашэння сацыяльна-палітычных супярэчнасцей і канфліктаў любога ўзроўню».
«Мы хочам быць упэўнены, што рашэнне суда будзе вынесена аб’ектыўна, бесстаронне ў адпаведнасці з прынцыпам In dubio pro reo. Улічваючы ўсё вышэй выкладзенае, высокую грамадскую значнасць будучага судовага працэсу, з’яўляючыся прыхільнікамі прынцыпаў і міжнародных рэгламентацый у дачыненні да свабоды думкі, свабоды сходаў, справядлівага суда, мы перакананы ў тым, што справа Уладзіміра Мацкевіча павінна быць разгледжана ў адкрытым судовым пасяджэнні, доступ зацікаўленай грамадскасці на судовае пасяджэнне павінен быць забяспечаны і гарантаваны,» — адзначаецца ў звароце. Падпісаць зварот у падтрымку філосафа і метадолага Мацкевіча можна па спасылцы.
Што вядома на дадзены момант?
Уладзімір Мацкевіч быў затрыманы 4 жніўня 2021 года і ўжо амаль дзевяць месяцаў утрымліваецца па арыштам у СІЗА № 1 г. Мінска. 6 жніўня быў прызнаны палітвязнем. У знак пратэсту супраць ходу следства ў лютым 2022 года Уладзімір Мацкевіч абвясціў галадоўку, якая працягвалася 13 дзён і выклікала шырокую рэакцыю міжнароднай грамадскасці.
14 красавіка стала вядома, што крымінальная справа ў дачыненні да Уладзіміра Мацкевіча накіравана ў Мінскі гарадскі суд. Яго абвінавачваюць ва ўдзеле ў «нядзельным маршы» 25 кастрычніка 2020 г. (ч. 1 арт. 342 КК), абразе «на адрас кіраўніка дзяржавы» (ч. 1 арт. 368 КК), а таксама «стварэнні і кіраўніцтве экстрэмісцкім фарміраваннем» (ч. 1 арт. 361-1, гаворка ідзе аб Платформе народных прадстаўнікоў «Сход»). Толькі апошні артыкул прадугледжвае пакаранне аж да сямі гадоў пазбаўлення волі.
