Пад петыцыяй на платформе petitionsby падпісаліся больш за 2500 чалавек.
«Мы, ніжэйпадпісаныя патрыёты Рэспублікі Беларусь, патрабуем усталяваць у сталіцы помнік С. С. Шушкевічу і назваць адну з вуліц у Мінску ў яго гонар», — напісана ў звароце.
30 мая прыйшоў адказ з мінгарвыканкама на зварот грамадзян за подпісам намесніка старшыні гарвыканкама Арцёма Цурана: «Станіслаў Шушкевіч уключаны ў спіс вядомых дзеячаў, імёны якіх прапанаваны для прысваення найменняў састаўным часткам Мінска».
Зварот будзе перанакіраваны ў адпаведную камісію і прыняты пад увагу пры назве новых вуліц. Але, на дадзены момант, заявак на прысваенне найменняў новым вуліцам не паступала. Сродкі на ўстаноўку помніка першаму кіраўніку незалежнай Беларусі ў гарадскім бюджэце не прадугледжаны.
Чым вядомы Станіслаў Шушкевіч?
Ён нарадзіўся ў 1934 годзе і ўсё жыццё пражыў у Мінску. У 1956 годзе скончыў фізіка-матэматычны факультэт Беларускага дзяржаўнага ўніверсітэта, у 1959 годзе — аспірантуру Інстытута фізікі Акадэміі навук Беларускай ССР. Доктар фізіка-матэматычных навук (1970). У 1969 годзе ён стаў дацэнтам кафедры ядзернай фізікі. У 1973 годзе ўзначаліў кафедру ядзернай фізікі.
З 1986 года Шушкевіч, працягваючы загадваць кафедрай ядзернай фізікі, працаваў прарэктарам па навуковай рабоце Беларускага дзяржаўнага ўніверсітэта. Станіслаў Шушкевіч падрыхтаваў 33 кандыдаты навук, з якіх сем сталі дактарамі навук. Аўтар больш за 150 навуковых прац, у тым ліку трох манаграфій, аднаго падручніка, 72 аўтарскіх пасведчанняў.
У 1990 годзе Шушкевіч быў абраны дэпутатам Вярхоўнага Савета Беларусі і заняў пасаду першага намесніка старшыні Вярхоўнага Савета Беларусі. 9 верасня 1991 года быў абраны старшынёй Вярхоўнага Савета Беларусі.
Станіслаў Станіслававіч Шушкевіч — чалавек, дзякуючы намаганням якога, Беларусь у 1991 годзе атрымала рэальную незалежнасць.
Пачытайце таксама: «Яго імя назаўсёды ўвайшло ў гісторыю». Вядомыя беларусы пра адыход Станіслава Шушкевіча
Памёр 3 мая 2022 года у Мінску.
