Вы фрылансер, праца чакае, а хатняя кава ўжо зацяпала? Тады вам варта куды-небудзь выбрацца! Але куды? Мы працягваем наш цыкл freelance-friendly месцаў Мінска!

 Ранак. Снег не паспеў затрымацца на вуліцах нашай сталіцы – усё пачало даволі хутка раставаць. Але высокая вільготнасць робіць прагулкі не самымі прыемнымі. А гэта азначае адно – варта пашукаць не самае дрэннае месца для працы і сагрэцца цёплай ранішняй кавай. Чарговы раз шлях ідзе ад плошчы Якуба Коласа, але ўжо па праспекце. І тут я заўважыў шыльду “Старыя традыцыі”. Цікава, ці ўключаюць яны традыцыю freelance-friendly ўмоў? Давайце праверым!

Месцазнаходжанне

Праспект Незалежнасці, насупраць ГЦ “Маскоўска-Венскі”. Адсюль блізка да станцыі метро “Плошча Якуба Коласа”, прыпынку 100-га аўтобуса і, бліжэй за ўсё, да трамвайных ліній. Нельга сказаць, што выбар вельмі багаты, але дастатковы, каб дабрацца да асноўных месцаў. У астатніх выпадках давядзецца крыху пагуляць.

Асноўны набор ёсць, але без шырокага выбару, таму за месцазнаходжанне – палова кубка кавы.

Кава/гарбата

 Гэта лічыцца рэстаранам (не палохайцеся, цэны тут сярэднія), то выбар “працоўных” напояў збольшага пурытанскі: амерыкана, латэ, эспрэса, капучына, глясэ, гарбата розных відаў. Але тут ёсць і некалькі даволі цікавых напояў, напрыклад, кава па-карыбску (там усяго пакрыху, розныя вяршкі, фрукты і г.д.), імбірная, абляпіхавая і клубнічна-апельсінавая гарбата.

Ёсць яшчэ і розныя дэсерты, але іх кошт традыцыйна даволі высокі.

За гэты набор з нацяжкай, але кубак кавы.

Меню

Гэта спецыяльны пункт, які з’явіўся толькі таму, што нашае сённяшняе месца – рэстаран. Адразу варта адзначыць, што “Старыя традыцыі” спецыялізуюцца на, вядома, традыцыйнай кухні, але цэны на большасць блюдаў высокія. Шчыра кажучы, я дагэтуль не разумею, як 300-грамовы бургер можа каштаваць 12 рублёў!

Але ж мы не есці прыйшлі. Хаця… калі вы тут з ранку ці падчас абеду, то вам пашчасціла – сняданкавае і абедзеннае меню даволі таннае. Можна паесці менш за 10 рублёў! Напрыклад, суп дня (2 рублі) + ростбіф з яйкам (3 рублі) + вараная бульба з зелянінай і алеем (1,20 рубля) + аладкі са смятанай (1,50 рубля) = 7.70 рубля за першае, другое і дэсерт!

За сняданак і абед – кубак кавы!

Цэны

Мы ўжо крыху закраналі гэтую тэму, але тут мы падрабязней пра напоі. Дыяпазон цэнаў на каву – 2,30-3,90 рубля. Дэмакратычна, але порцыі тут невялікія, таму задавальненне давядзецца расцягваць. Калі шчыра, мяне шакавалі цэны на гарбату. Ну сапраўды, як можа гэты пакетаваны напой, нават нямецкі, каштаваць 3,80 рубля!? Я ўжо маўчу пра вышэйзгаданыя імбірныя і фруктовыя гарбаты – іх цэннік сягае ажно 5 рублёў. Можа, таму, што рэстаран? Хто яго ведае, але раю тут браць каву, калі хочаце эканоміць.

За цэны – палова кубка кавы.

Разеткі

 Яны тут ёсць амаль каля ўсіх столікаў, якія прымыкаюць да сцяны. На жаль, адна на месца, але для працы павінна хапіць.

За наяўнасць – кубак кавы.

WI-FI

 Ёсць і працуе стабільна. Але хуткасць даволі нізкая, таму нічога асабліва не напампуеш. Вынікі тэсту хуткасці можаце паглядзець на малюнку.

За наяўнасць, але даволі марудны інтэрнэт (мы ж у самым разгары інтэрнэт-эпохі!) – палова кубка кавы.

Прыбіральня

Ёсць, і звычайная, як ва ўсіх такіх установах.

Кубак кавы за наяўнасць.

Час працы

Калі вы працуеце не з самага ранку, то час працы для вас будзе казкай – з 10 да 24 гадзін, а ў пятніцу і суботу – ажно да гадзіны ночы!

Таму за час адназначна кубак кавы!

Атмасфера і інтэр’ер

 Пытанне густу, канечне, але выкажуся па сваіх адчуваннях. Сам інтэр’ер даволі прыемны – з лёгкім налётам “традыцыйнасці”: драўляныя планкі, дэкаратыўная плітка ў выглядзе цаглінак, розныя каляровыя вазачкі і г.д. Столікі з дрэва, збольшага ўсе крэслы тут мяккія, таму можна пасядзець з камфортам. АЛЕ наконт музыкі тут зусім не напружваюцца. З тэлевізара ідзе канал VH+1 – простая дарога да бесперапыннай сусветнай папулярнай музыкі. Таму калі вы выключны аўдыёгурман, бярыце з сабой бярушы!

Ёсць пэўныя прыдзіркі, таму палова кубка кавы.

Забіць нельга памілаваць. Ставім канчатковую коску

 Наўрад ці гэта стане вашым улюбёным месцам у горадзе, але доўгі час працы, адносная блізкасць да метро і трамвая, а таксама разеткі, інтэрнэт і адносна танная кава робіць “Старыя традыцыі” пурытанскім, але ўсё ж freelance-friendly месцам. А за абедзеннае меню і яго цэны – асобны лайк!

6/9 кубкаў кавы

Пурытанскае месца для фрылансераў, якія хочуць затрымацца дапазна.

Глядзі таксама: Праца ці кава. Wake up cafe

Багдан Сакалоў, budzma.org