Абмеркавана будзе рэстаўрацыя палаца Стэфана Баторыя. Пра гэта заявіла начальніца ўпраўлення культуры аблвыканкама Алена Клімовіч.

Другі этап рэстаўрацыі Старога замка

З яе словаў, зараз вядзецца актыўная праца па стварэнні інтэр’ерных экспазіцый у Старым замку. Плануецца, што будуць завершаныя Замкавая капліца, каралеўская лазня, пакоі чыноўніка. Што тычыцца алебастравай залы — месца адпачынку караля, то там вельмі складаны камін, таму ёсць верагоднасць, што працы завершацца ў 2023 годзе. Усе памяшканні аднаўляюцца па аналагам XVI стагоддзя. Работы выконваюць спецыялісты Белрэстаўрацыі.

«Адна з такіх складаных і важных задач, якую зараз мы вырашаем, — праектаванне другой чаргі Старога замка. Яна ўключае сам палац Стэфана Баторыя. Літаральна ў гэтыя дні будзе разглядацца ўжо праект па рэканструкцыі будынка каралеўскага палаца, над якім вялася праца цэлы год», — заявіла Клімовіч

Якія замкі рэканструююць яшчэ?

Акрамя таго, ідуць работы па кансервацыі сцен Гальшанскага замка — аб’екта, які карыстаецца вялікім попытам у турыстаў. Адна з яго вежаў ужо музеефікавана. Задача цалкам аднаўляць замак не стаіць.

Працягваюцца работы па аднаўленні Крэўскага замка. Завяршаецца рэстаўрацыя трэцяй сцяны, паралельна ідзе праектаванне Княжацкай вежы. У Навагрудскім замку — кансервацыя Пасадскай і Дазорнай вежаў. У гэтым годзе плануецца скончыць праект па вежы Шчытоўка. Падыход пры работах на Навагрудскім замку аналагічны таму, што ўжываецца на Гальшанскім. Вежа Шчытоўка будзе ўзведзена ў сваіх параметрах, якія вызначаныя ў выніку навуковых даследаванняў. У ёй створаць музейную экспазіцыю, дзе можна будзе ўбачыць макет замка, шматлікія археалагічныя артэфакты, знойдзеныя падчас раскопак у розныя гады. Астатнія ж часткі руін закансервуюць.