У халодны сезон у Беларусі, калі вельмі шмат дзяцей хварэе, а некаторыя вымушаныя знаходзіцца ў лякарнях, востра паўстаюць пытанні па правах няпоўнагадовых, звязаных з іх здароўем, яго аховай.

Фота – PAP

Не сакрэт, што ў многіх бацькоў узнікаюць непаразуменні, а ў некаторых – нават і канфліктныя сітуацыі з лекарамі. У тым ліку калі справа тычыцца немагчымасці знаходжання побач з дзецьмі ў лякарні.

Рэч у тым, што, згодна з беларускім заканадаўствам, адзін з бацькоў ці апекуноў мае права знаходзіцца з хворым няпоўнагадовым у лякарні, толькі калі апошняму не споўнілася яшчэ 5 гадоў альбо ў выпадку абмежавання жыццядзейнасці.

На гэтую праблему ўжо неаднаразова звярталі ўвагу бацькі, ёсць некалькі публікацый у прэсе, але на жаль, сітуацыя не змяняецца. І дзеці вымушаныя заставацца без бацькоў у лякарнях.

А ў некаторых выпадках гаспіталізацыі дзяцей да 5 гадоў бацькі вымушаныя знаходзіцца ў лякарнях у вельмі неспрыяльных умовах: адсутнасць ложкаў для дарослых, шмат людзей у пакоі, што можа замінаць працы медыкаў.

На жаль, закон аб правах дзяцей недастаткова адназначна трактуе шмат сфераў жыццядзейнасці, што дазваляе заканадаўцам трактаваць артыкулы гэтага дакумента па-рознаму. Так, да 2006 года гаспіталізацыя з бацькамі дазвалялася ўвогуле толькі для дзяцей да 3 гадоў. Пасля гэтую норму змянілі.

Але большасць бацькоў ці апекуноў недастаткова дасведчаная, каб ведаць усе заканадаўчыя акты.

Таму пазбегнуць неадназначных сітуацый бывае вельмі цяжка.

Нават на момант публікацыі матэрыяла невядома пра якое-небудзь абмеркаванне становішча. Што відавочна сведчыць пра адсутнасць зразумелай тэхналогіі па абмеркаванні і рэалізацыі правоў нават у такой сферы, як абарона здароўя нашых дзяцей.

Фота – Publimetro

Еўрапейскі досвед абароны правоў дзяцей у лякарнях

Варта зірнуць на еўрапейскі досвед, дзе пра правы дзяцей падчас лячэння загаварылі яшчэ ў 80-х гадах мінулага стагоддзя.

Так, у 1988 годзе была падпісаная адпаведная канвенцыя, якую ратыфікавалі ўлады, у тым ліку суседніх з Беларуссю дзяржаў.

Сярод агульных пунктаў пра інфармацыю пра хваробы, знаходжанне з аднагодкамі, права на "вольны час" адзначаецца неабходнасць знаходжання бацькоў альбо апекуноў. Без ніякіх абмежаванняў узросту.

Асобным пунктам вядзецца пра тое, што з бацькоў не могуць спаганяцца дадатковыя грошы. Разам з тым аўтары канвенцыі пакінулі для медыкаў магчымасць атрымліваць аплату за знаходжанне бацькоў, але ў абмежаваным памеры.

Так, у суседняй Польшчы гэты пункт рэалізуецца шляхам утрымлівання з бацькоў кампенсацыі за карыстанне вадой, электраэнергіяй ды іншымі дабротамі па сабекошце.

Праваабаронцы ў Польшчы адзначаюць, што ў выпадках, калі па тэхнічных ці іншых акалічнасцях знаходжанне бацькоў увесь час побач з дзецьмі немагчымае, неабходна аказваць няпоўнагадовым дастатковую апеку з боку псіхолагаў ці выхавацеляў. Таксама ўвесь час прыкладаюцца намаганні па паляпшэнні камфорту знаходжання бацькоў у лякарнях. У тым ліку прадуглежваецца наяўнасць камп’ютараў і сродкаў сувязі ў памяшканнях.

Фота –Pressalert

Магчымасці для ўздзеяння

У Беларусі пакуль не дзейнічаюць падобныя нормы. Нават не чуваць меркаванняў па тэме.

Цяжка ўявіць, каб бацькі і неабыякавыя грамадзяне не звярталіся са зваротамі і патрабаваннямі далейшага абмеркавання такога роду праблем для прывядзення норм заканадаўства да агульнапрынятых еўрапейскіх.

Магчыма, не хапае кансалідаванага ўздзеяння на ўладу праз моцныя бацькоўскія арганізацыі, здольныя ўплываць на сітуацыю.

Аляксей Гайдукевіч, budzma.org

Сачыце за нашымі публікацыямі ў Telegram, Facebook, Вконтакте ды Twitter! А ў нашым Instagram вас чакаюць яскравыя фота!