1 снежня 2016 года ў Школе мастацтваў г. Бярэзіна Мінскай вобласці адбылася літаратурна-музычная вечарына ў межах кампаніі “Пяцісотгоднасць”, арганізаванай Саюзам беларускіх пісьменнікаў і Згуртаваннем беларусаў свету “Бацькаўшчына” ў межах грамадскай культурніцкай кампаніі “Будзьма беларусамі!”.

Бярэзінскую школу мастацтваў наведалі госці з Мінску: паэт Віктар Сямашка і музыкі Лявон Нарушэвіч з Дзянісам Кудраўцавым.

У залі сабраліся каля 30 навучэнцаў разам са сваімі настаўнікамі. Яны мелі магчымасць пачуць і назіраць, як нараджаецца і гучыць музыка падчас сумеснай спантаннай імправізацыі. Разам з музыкай гучалі меладэкламацыі на вершы Максіма Багдановіча.

Паколькі нагодай сустрэчы стала падзея амаль пяцісотгадовай даўніны, калі Францыск Скарына ў далёкай Празе выдаў першую друкаваную кнігу па-беларуску, удзельнікі сустрэчы прынялі актыўны ўдзел у літаратурнай віктарыне па беларускай літаратуры і кнігадрукаванні. Вучні з цікавасцю адказвалі на пытанні гісторыі беларускай кнігі, даведаліся малавядомыя факты аб творах Я. Баршчэўскага, М. Багадановіча, У. Караткевіча, Я. Коласа, дазналіся аб акалічнасцях друку самых першых беларускіх кніг. У выніку самыя кемлівыя атрымалі прызы.