Андрэй Іванец распавёў, як будзе праходзіць размеркаванне ў гэтым навучальным годзе, у тым ліку для выпускнікоў платнай формы навучання, адзначае Белта.

Раней Старшыня Савета Рэспублікі Нацыянальнага сходу Наталля Качанава на сустрэчы са студэнтамі заявіла, што абавязковае размеркаванне будзе датычыцца і студэнтаў платнай формы навучання: «Міністэрству адукацыі, ВНУ пастаўлена задача размяркоўваць не толькі тых, хто навучаўся на бюджэтнай аснове, а размяркоўваць усіх».

На яе думку, выпускніку ВНУ дзяржава павінна прадаставіць першае месца працы. Зацікавіць маладых спецыялістаў планавалі выдачай арэнднага жытла ці месца ў інтэрнаце, надбаўкай да заробку ў 20% і пастаноўкай на ільготную чаргу будаўніцтва жылля.

24 лістапада Міністр адукацыі Андрэй Іванец удакладніў: «Гэта не кажа пра тое, што мы будзем абавязваць нашых выпускнікоў платнай формы навучання размяркоўвацца, але мы будзем актыўна прапаноўваць ім выкарыстоўваць такую магчымасць, паказваць яе перавагі».

Ён дадаў, што гэтая стратэгія не новая і дадзеная практыка замацавана ў Кодэксе аб адукацыі і прымяняецца ўжо на працягу шэрагу гадоў.

Зараз выпускніку, які вучыўся на бюджэтнай форме адукацыі, трэба адпрацаваць два гады па размеркаванню. Калі вучоба ажыццяўлялася па накіраванню пэўнай установы — 5 год. Пазбегнуць размеркавання можна пайшоўшы ў войска, сплаціўшы поўны кошт навучання або пайшоўшы ў дэкрэтны адпачынак. Таксама можна паступіць у магістратуру і аспірантуру, але потым усё роўна прыйдзецца адпрацоўваць.

Беларусь — адзіная краіна ў Еўропе, дзе ёсць абавязковае размеркаванне пасля атрымання вышэйшай адукацыі.