Гурт Relikt запісаў беларускую народную песню «Адзін месяц сходзіць...». Трэк запісаны ў незвычайнай для калектыву стылістыцы — музыкі спелі ўсё акапэльна, без інструментаў.
Гэта бяседная мужчынская песня, якая была запісана ў вёсцы Вялікае Малешава Столiнскага раёна. Звычайна Relikt робіць свае апрацоўкі народных песень, але гэтым разам музыкі пераканаўча даказалі, што могуць гэта зрабіць і ў традыцыйным рэчышчы, так як гэта рабілі нашы продкі. Запіс быў падрыхтаваны да Купалля, каб больш шырокае кола людз ей пачула чыстую сапраўдную спрадвечную беларускую песню.
Музыкі вучыліся спяваць пад носьбітаў традыцыі. Дапамагала ім у гэтым даследчыца і этнограф Ірына Мазюк, якая не толькі пазнаёміла музыкаў з матэрыялам, але і дамаглася таго, каб запелі нават не вакалісты. Праспявалі песню гітарыст Віталь Макшун і бубнач Аляксандр Дземідзенка.
Зараз Relikt рыхтуе зусім іншы альбом, які мусіць выйсці летам. Чакаецца, што ён адкрые яшчэ адну рокавую грань гурта.
Паслухаць новы трэк можна па спасылцы ці на старонцы гурта «УКантакце».