Сёння свой дзень народзінаў святкуе вядомы актор з Новай Зеландыі Расэл Кроу – яму 56 гадоў. За сваю кар’еру Кроу сыграў шмат разнапланавых і арыгінальных роляў у фільмах, якія і цяпер глядзяцца з цікавасцю. Прапануем сваю падборку 5 найлепшых фільмаў з яго ўдзелам.
1. “Скіны” (Romper Stomper, 1992)
Адзін з першых фільмаў, дзе была гучна ўзнятая праблема неанацызму ў моладзевых асяродках. Стужка распавядае пра жыццё банды нацы-скінхэдаў з Мельбурна, а Кроу грае ў ёй Хэнда – харызматычнага лідара групоўкі. Маладыя скінхэды бавяць час за выпіўкай і тусоўкамі без асаблівай перспектывы на лепшую долю. Ва ўсіх бедах яны вінавацяць чужынцаў і час ад часу нападаюць на іх. Акрамя гэтага ўнутры самой групоўкі разлад – са з’яўленнем новай дзяўчыны паміж найлепшымі сябрамі Хэнда і Дэйві пачынаецца канфрантацыя, якая ў выніку прыводзіць да трагедыі.
За гэтую ролю актор атрымаў нацыянальную аўстралійскую кінапрэмію, яна ж прынесла яму сусветную вядомасць і прызнанне.
2. “Гладыятар” (Gladiator, 2000)
Фільм распавядае гісторыю непераможнага рымскага палкаводца Максімуса, які шляхам інтрыгаў пазбаўляецца ўсіх сваіх прывілеяў і пасады. Яго прыгаворваюць да пакарання смерцю, але яму ўдаецца застацца ў жывых. Сям’я Максімуса гіне.
Былога палкаводца падбірае гандляр рабамі і прадае. Так Максімус робіцца гладыятарам – байцом, які вымушаны выходзіць на арэну і забаўляць публіку, забіваючы сваіх праціўнікаў. На гэтай ніве, як і ва ўсім астатнім, галоўны герой дабіваецца сапраўднага трыумфу.
За гэтую ролю Кроу атрымаў прэмію “Оскар” у намінацыі «Найлепшая мужчынская роля». Нягледзячы на тое, што стужка была знятая 20 гадоў таму, яна і цяпер глядзіцца вельмі хораша.
3. “Гульні розуму” (A Beautiful Mind, 2001)
Экранізацыя аднайменнай кнігі амерыканскай пісьменніцы Сільвіі Назар, якая прысвечаная жыццю Джона Форбса Нэша, лаўрэата Нобелеўскай прэміі па эканоміцы.
Стужка распавядае пра няпросты шлях да поспеху і прызнання таленавітага матэматыка, хворага на шызафрэнію. Увагі заслугоўвае не толькі сапраўды ўнікальная гісторыя галоўнага героя, які вымушаны пераадольваць праблемы фактычна ў адзіночку, але і атмасфера, бо фільм здымалі ў вядомых універсітэтах Амерыкі – Гарвардзе і Прынстане.
Асобна варта адзначыць лінію кахання – Алісія, жонка Нэша, заставалася з ім побач нягледзячы ні на што.
4. “Гангстар” (American Gangster, 2007)
Фільм, як і папярэдні, заснаваны на рэальных падзеях. Гісторыя пра тое, як сціплы кіроўца крымінальнага аўтарытэта вырашае заснаваць уласную імперыю, і яму гэта ўдаецца.
Фрэнк Лукас, якога грае ў стужцы Дэнзэл Вашынгтан, – персанаж, вядомы не менш за Пабла Эскабара. На мяжы 60–70-х гадоў ён арганізоўвае буйныя пастаўкі гераіну ў Нью-Ёрк. Лічыцца, што наркотыкі перавозілі на бартах амерыканскіх ВПС разам з целамі забітых у В’етнаме салдатаў. Супрацьстаіць яму непадкупны паліцэйскі Рычы Робертсан – Расэл Кроу, які ў выніку і адпраўляе наркабарона за краты.
Рэальны Лукас атрымаў 70 гадоў турмы з якіх адседзеў толькі пяць – пайшоў на супрацу з праваахоўнікамі. Памёр у мінулым годзе.
Нягледзячы на тое, што многія факты ў фільме ставяцца пад сумнеў, ён, безумоўна, заслугоўвае ўвагі аматараў жанру.
5. “Ной” (Noah, 2014)
Вельмі адвольная інтэрпрэтацыя Дарэнам Араноўскі кананічнага біблейскага сюжэту пра сусветны патоп.
Гэтую стужку варта паглядзець ужо хаця б дзеля зорнага складу актораў, якія зняліся ў ёй. Кажуць, яна нікога не пакідае абыякавым.
