Першы канал Грузіі зняў і паказаў у эфіры дакументальны фільм, галоўнай гераіняй якога стала спявачка Руся (Марына Шукюрава), лідарка беларускага гурта Shuma, паведамляе @BelarusWithUkraine.

Пасля падзей 2020 года жанчына разам з маленькай дачкой была вымушаная з’ехаць з Беларусі. Спачатку ўладкавалася ў Кіеве, але праз пэўны час пераехала ў Тбілісі.

Стужка расказвае пра тое, чым жыве Руся сёння, — праводзіць галасавыя трэнінгі, чытае беларускім дзеткам казкі на роднай мове, пры магчымасці ладзіць канцэрты і выступае ў мясцовых клубах. А яшчэ — вучыцца смеласці, эмацыйнай шчырасці ў грузінскага народа, вельмі сумуе па роднай зямлі і перажывае за блізкіх па духу ўкраінцаў, дапамагае ім. Таму сёння ўвечары Shuma разам з іншымі беларускімі дыджэямі Papa Bo Selektah і Dj Designer ладзяць канцэрт у падтрымку Украіны. Тут можна будзе вытанцаваць роспач і ўзбадзёрыцца пачуццём адзінства, шматгалосна заявіць, што беларусы — не саюзнікі ўлады, што мы — супраць вайны. 

20 сакавіка 2022 (нядзеля)
з 20:00 да 02:00
Cafe Gallery (Грыбаедава, 34)
Уваход — данаты ад 20GEL
Усе сродкі будуць пералічаныя ў падтрымку дзяцей Украіны — Фонд Св. Мікалая