Галоўнае следчае ўпраўленне Следчага камітэту прыняла да вытворчасці крымінальную справу ў дачыненні Кацярыны Каланчук-Ваданосавай. Пра гэта паведаміў афіцыйны прадстаўнік ведамства Сяргей Кабаковіч, піша Белсат.

Кацярына Ваданосава

Паводле СК, Кацярына Ваданосава «ў змове з экстрэмісцкімі фармаваннямі» сістэматычна публікуе на Youtube матэрыялы, нібыта накіраваныя на рэабілітацыю нацызму.

«Асноўная мэта — рэалізацыя ідэалагічнай дыверсіі, замаскаванай пад «асветніцкія лекцыі». Называючы сябе «экспертам» у гісторыі Вялікай Айчыннай вайны, яна груба фальсіфікуе і перакручвае гістарычныя факты, маніпулюючы асобнымі эпізодамі беларускай гісторыі для рэабілітацыі нацызму і гераізацыі яго паслядоўнікаў», — заявіў Сяргей Кабаковіч.

У прыватнасці, ён заявіў: «адкрыта ўзвялічваецца галоўны нацысцкі злачынец на беларускай зямлі» генеральны камісар Беларусі Вільгэльм Кубэ і праслаўляюцца «таксама памагатыя акупантаў» з ліку дапаможнай паліцыі і Беларускай Цэнтральнай Рады.

«Асаблівую небяспеку гэтай дзейнасці заключаецца ў мэтанакіраваным дэструктыўным уздзеянні на свядомасць насельніцтва. Кантэнт наўмысна разлічаны на неабмежаваную аўдыторыю, асабліва на моладзь, і накіраваны на тое, каб перапісаць гісторыю, апраўдаць нацысцкія злачынствы, сеяць рэваншысцкія настроі і падрываць фундаментальныя каштоўнасці беларускага народу», — адзначыў Кабаковіч.

Генеральная пракуратура Беларусі распачала ў дачыненні Ваданосавай крымінальную справу аб «рэабілітацыі нацызму» праз відэаролікі на YouTube. Справа распачатая паводле ч. 3 арт.130-1 Крымінальнага кодэксу Беларусі — «наўмысныя дзеянні ў рэабілітацыі нацызму». Сама вядоўца адзначыла, што ў ейным жыцці ад гэтага нічога не зменіцца.