У сувязі з эпідэміялагічнай сітуацыяй «жываслоўцы» перанеслі святкаванні юбілею на Дзень тэатра –  27 сакавіка 2022 года. Але тэатр працягвае выступаць на пляцоўках, куды яго запрашаюць музеі і бібліятэкі.

Тэатр жыве беларускай мовай

Да 55-годдзя «Жывое слова» аднаўляе спектакль «Цень» паводле п’есы Яўгена Шварца, які можна будзе ўбачыць у хуткім часе. А таксама ўдзельнікі тэатра ладзяць інтэрактыў на афіцыйных старонках «Жывое слова & кампанія» у сацыяльных сетках.

«Жывое слова» – гэта адзін са страрэйшых аматарскіх калектываў Беларусі і адзіны студэнцкі тэатр, які жыве выключна беларускай мовай.

Яго ўдзельнікі ў Беларускім дзяржаўным педагагічным універсітэце імя Максіма Танка працуюць з літаратурнымі тэкстамі, удасканальваюць уменні данесці мастацкае слова гледачам.

Крыху з гісторыі «Жывога слова»

Тэатр быў створаны ў лістападзе 1966 года на філалагічным факультэце Мінскага дзяржаўнага педінстытута імя Горкага былым акцёрам Нацыянальнага акадэмічнага тэатра імя Янкі Купалы, выкладчыкам педінстытута і акадэміі мастацтваў Андрэем Калядой. У 1977 годзе калектыў атрымаў званне «Народны». Сёння ён аб’ядноўвае студэнтаў самых розных факультэтаў БДПУ.

Традыцыі, закладзеныя Андрэем Калядой зберагалі і развівалі яго пераемнікі: Юрась і Алена Чарэнкі, Наталля Кухарава і Уладзімір Трапянок. Ад 2012 года тэатрам кіруюць Алеся Сівохіна і Алесь Мойскі.

«Жывое слова» захоўвае традыцыю тэатральных выпускных і капуснікаў, а таксама вечарын уласнай творчасці «Атрасіны», калі ўдзельнікі тэатра самі становяцца рэжысёрамі і сцэнарыстамі, такім чынам «атрасаюць» творчыя здабыткі за год.

Да 130-годдзя Багдановіча

На працягу навучальнага года ў тэатры існуе Клуб творчых дыялогаў, куды «жываслоўцы» запрашаюць вядомых дзеячаў культуры, пісьменнікаў, людзей, якія зрабілі ўнёсак у развіццё беларускага мастацтва.

Тэатр кожны год паказвае літаратурна-музычныя кампазіцыі, прысвечаныя слаўным юбілейным датам. Так, сёлета «Жывым словам» падрыхтавана кампазіцыя да 130-годдзя з дня нараджэння Максіма Багдановіча. 3 снежня мастацкі кіраўнік тэатра Алеся Сівохіна з гэтай нагоды выступіць разам з загадчыкам філіяла Дзяржаўнага музея гісторыі беларускай літаратуры «Літаратурны музей Максіма Багдановіча» Міхалам Бараноўскім у бібліятэцы №14 імя Багушэвіча.

А 9 снежня, у дзень нараджэння паэта, у Літаратурным музеі Максіма Багдановіча выступяць усе ўдзельнікі тэатра «Жывое слова»:

нехта ўвасобіць вобраз пісьменніка ў дзяцінстве, хтосьці стане закаханым рамантыкам-Багдановічам у юнацтве, а некаму давядзецца адчуць перажыванні паэта перад смерцю.

Па сюжэце кожны з «багдановічаў» сустрэне герояў сваіх твораў. А што з гэтага атрымаецца, можна даведацца, наведаўшы музей паэта.

Як далучыцца да святкавання

За апошняе дзесяцігоддзе тэатрам былі пастаўлены спектаклі паводле твораў Караткевіча, Брэдберы, Палуяна, Ластоўскага, Борхеса і ўжо згаданы «Цень». Апошні «Жывое слова» ставіць з абноўленым складам удзельнікаў, для многіх з якіх адбудзецца дэбют на малой сцэне БДПУ 28 снежня.

На афіцыйных старонках у сацыяльных сетках удзельнікі тэатра запусцілі песенны флэшмоб, і кожны з выпускнікоў можа запісаць на відэа любімую «жываслоўскую» песню і выкласці яе пад хэштэгам #спяваежывоеслова. Гэта можа быць як сольны запіс, так і выкананне дуэтам. У відэазапісе можна зрабіць выклік і перадаць эстафету камусьці з выпускнікоў тэатра, пазначыўшы якую песню хочацца пачуць ці без таго. Самых актыўных удзельнікаў флэшмобу чакаюць падарункі падчас святкавання юбілею.

У сацсетках кожны тыдзень выкладаюцца відэагісторыі пра тэатр ад цяперашніх «жываслоўсцаў». Гэта віншаванні, вясёлыя і кранальныя выпадкі з тэатральнага жыцця. А таксама ўвазе падпісчыкаў – лепшыя нумары з канцэртных праграм тэатра «Жывое слова». Ужо зараз VKontakte, FaceBook і Instagram даступныя сцэнічныя ўрыўкі з рамана Івана Мележа «Людзі на балоце» і Уладзіміра Караткевіча «Сіняя-сіняя».

3, 9 і 28 снежня тэатр запрашае на згаданыя пляцоўкі, дзе пасля выступленняў будзе магчымасць сустрэцца з удзельнікамі «Жывога слова».