Дзякуючы кніжнаму праекту кампаніі velcom гэта рэальна для кожнага, хто любіць сучасную беларускую літаратуру.
21 лютага, у Дзень роднай мовы, чарговая пераможца тэсту, выбраная сярод 20 прэтэндэнтаў рандомна, сустрэлася з зоркай прыгожага пісьменства Альгердам Бахарэвічам.
Браніслава Грэская – інжынер-тэхнолаг па спецыяльнасці, сёння дыстрыб’ютар у фірме касметыкі ды авантурная падарожніца. Нават пра Бахарэвіча яна даведалася ў вандроўцы: ляцела ў самалёце, чытала часопіс “On Air”, там трапілася інтэрв’ю з пісьменнікам. Калі стужка навін вынесла яе на сайт movabox, яна не задумваючыся рызыкнула адказаць на пытанні паводле рамана “Дзеці Аліндаркі”.
Спадарыня Браніслава не глядзіць тэлевізар, бо яго ўжо колькі гадоў дома не мае, а сочыць за падзеямі праз інтэрнэт.
“Шаноўнай Браніславе. Хай вас не з’ядуць ваўкі і мядзведзі”, – падпісаў кнігу аўтар ды між іншым пацікавіўся, ці напіша яна пра сённяшнюю падзею на Фэйсбуку, хоць бы коратка “Сустрэлася з Бахарэвічам. Атрымала MOVABOX”.
У скрынцы з падарункамі – усё, што неабходна ў дарозе, асабліва калі яна ляжыць праз лес, як у рамане “Дзеці Аліндаркі”. Сродак ад камароў, кішэнны ліхтарык, шышка ды іншая прыемная драбяза, якая адпавядае духу і сюжэту твора.
Пераможца другога этапу MOVABOX вучылася ў беларускамоўнай школе (родам яна са Стаўбцоўшчыны), літаратурай зацікавілася яшчэ ў юнацтве. Спадарыня Браніслава нават дачку назвала ў гонар галоўнай гераіні апавядання Кузьмы Чорнага “Насцечка”.
У жыцці яна карыстаецца дзвюма мовамі. Жанчына расказала, што калі адпачывала ў Чарнагорыі, мясцовыя разумелі яе па-беларуску.
Аднаго разу яна прапанавала перайсці на мову ў сваёй касметычнай кампаніі, а значкі кансультантаў зрабіць у выглядзе валошкі. Аднак чалавека, з якім яна вяла перамовы, забралі працаваць у Маскву. Пачынанне засталося на ўзроўні ідэі.
Сустрэчы з пісьменнікамі для Браніславы Грэскай – не такая ўжо і незвычайнасць. На паказ беларускамоўнага перакладу фільма “Падынгтан” яна прыйшла разам з усёй сям’ёй (12 чалавек!). З пляменнікам хадзіла на спектакль “Браніслаў”. Нават думала паўдзельнічаць у кастынгу, які нядаўна абвяшчалі стваральнікі п’есы.
Спадарыня Браніслава марыць пра беларускамоўную роварную вандроўку ды яшчэ пазнаёміцца з Аленай Анісім: дэпутатка Палаты прадстаўнікоў таксама родам са Стаўбцоўшчыны.
Для ўсіх ахвотных выйграць трэці MOVABOX нагадаем, што цяпер праходзіць тэставанне на сайце movabox.by: чарговае літаратурнае выпрабаванне складзенае паводле твораў Віктара Жыбуля.
Хрысціна Марчук
Глядзіце таксама:
