Жыхар Крычава, народны майстар Беларусі Вячаслаў Якавенка, узнагароджаны расійскім памятным знакам «Пашана і Слава», які ён атрымаў на мінулым тыдні ў Маскве ў рэдакцыі Вялікай міжнароднай энцыклапедыі «Лепшыя людзі Расіі».
Ва ўзнагародным пасведчанні гаворыцца: «За адраджэнне традыцыйнай славянскай глінянай цацкі-свістулькі, за значны асабісты ўклад у захаванне і развіццё народных промыслаў і рамёстваў у традыцыйнай культуры Верхняга Падняпроўя». Шмат гадоў Вячаслаў займаецца лепкай і абпальваннем цацак-свістулек у старажытным выглядзе. Па сутнасці, гэты майстар адзін з першых пачаў даследаваць і адраджаць падняпроўскую цацку, зрабіў яе вядомай у Беларусі і за яе межамі. Сёння на радзіме многія ведаюць Вячаслава як удзельніка народных свят, фестываляў народных майстроў, рэспубліканскіх «Дажынак», Дзён беларускага пісьменства.
— Гэта мая першая вялікая ўзнагарода, — прызнаецца Вячаслаў Якавенка. Раней у мяне былі толькі адзнакі: «Ударнік камуністычнай працы» і «Пераможца 12-й пяцігодкі». За вялікі грамадска-значны ўклад у развіццё і працвітанне сферы культуры Беларусі, крычаўскі майстар занесены і ў Вялікую міжнародную энцыклапедыю «Лепшыя людзі Расіі».
Анатоль Кляшчук, Звязда
Budzma.by: Нагадаем, што праект выдання кнігі ад майстра В.М. Якавенкі пра гліняную ляльку Падняпроўя прадставіў Аляксей Карпенка на Кірмашы Праектаў у Магілёве.
Тэгі: Крычаў, Магілёўшчына
