11 снежня 2015 г. у  2 “А” клас школы № 23 надыйшлі Каляды  разам з выступам лялечнага тэтрыка “Лямцавая батлейка”. Дзеткі пабачылі спектакль “Мама Му, Крумкач і Каляды” паводле кніг шведскай пісьменніцы Юі Вісландэр.

Якая асалода выступаць перад дзеткамі, якія навучаюцца ў беларускамоўнай школцы! Яны добра ведалі і перакладалі нават з ангельскай мовы на беларускую словы моўнай віктарыны. Хлопчыкі і дзяўчынкі адчувалі і разумелі ўсе жарты, гульні і смешныя сітуацыі, у якія траплялі героі спектакля. Смяяліся ўсе!!!

Кожны глядач пасля атрымаў маленькі падаруначак ад кампаніі “Будзьма беларусамі!”, у межах якой і адбываўся выступ. Таксама дапамагла арганізаваць гэтую сустрэчу вядомая паэтка Аксана Спрынчан, якая пасля спектаклю пачаствала ўсіх Шклянкай малака – малочнымі цукеркамі ад Мамы Му.

Свята пачынаецца!!!

Да пабачэння! Да новых сустрэч! Чытайце кніжкі на роднай мове!

Калі Вы жадаеце, каб вясёлая Мама Му ў выкананні “Лямцавай батлейкі” прыехала да вас у школу ці бібліятэку і арганізавала сапраўднае шоу для дзетак альбо дарослых, пішыце на скрыню razam@budzma.org, і ваш зварот не застанецца без увагі.

Спектакль “Мама Му” ўжо прайшоў з поспехам у розных гарадах і рэгіёнах Беларусі (Мінск, Брэст, Дзяржынск, Слуцк, Заслаўе, Ждановічы, Мар’іна Горка). А патэнцыйным арганізатарам паведамляем, што пастанова разлічана на школьнікаў малодшага ўзросту.

Коратка пра аўтарку. Юя Вісландэр (Jujja Vislander) – шведская дзіцячая пісьменніца (нарадзілася ў 1944 г.), вядомая сваімі вясёлымі гісторыямі аб цудоўнай і адважнай гарэзе – карове Му, яе сябру-хвальку крумкачу Краксу ды іх сумесных прыгодах. У 2005 г. творчы дуэт Юі і Тумаса Вісландэраў быў уганараваны прэміяй імя Астрыд Ліндгрэн.

Тэгі: Мінск