Дакументальная карціна «Святая вада» («Woda święcona») беларускага рэжысёра Андрэя Куцілы ўганаравана прызам глядацкіх сімпатый і прызам «Манаполіс» за найлепшы тэлерэпартаж на фестывалі «Człowiek w Zagrożeniu», які адбываўся ў Лодзі з 16 па 22 кастрычніка. У праграме прынялі ўдзел 49 дакументальных фільмаў, 11 тэлевізійных рэпартажаў, 16 аўдыярэпартажаў. Перамогу здабыў фільм «Apolonia, Apolonia» Леі Глoб, спецыяльную ўзнагароду атрымаў украінскі рэжысёр Сяргей Лозніца.
Фота: Muzeum Kinematografii w Łodzi
«Прэмія за прыгожы, не надта літаральны, але надзвычай кранальны партрэт «людзей у небяспецы». Даваенны вобраз населенага пункта перад надыходзячай катастрофай. Запіс надзеі ўперамешку з нарастаючым страхам і назіранне за індывідуальнымі спосабамі барацьбы са страхам» - адзначаецца ў апісанні ўзнагароды.
Фільм 2023 года, працягваецца 19 хвілін, вытворца — тэлеканал «Белсат».
Пра што карціна?
«У адным з раёнаў Кіева ў чарговы раз адзначаюць свята Хрышчэння Гасподняга. Для гэтага ў возеры побач высеклі палонку. На беразе чуваць, як звоняць царкоўныя званы. Людзі распранаюцца і стаяць у чарзе. Да нападу Расіі на Украіну засталося 36 дзён. Буйныя планы людзей рознага ўзросту, галерэя аголеных цел і кароткія дыялогі расказваюць пра крохкасць жыцця, супярэчлівасць чалавечай веры і радасць стойкасці»
Як адзначае reform.by, беларускі рэжысёр таксама працаваў на фестывалі ў складзе журы конкурсу дакументальнага кіно.
«Праграма была вельмі моцнай! — падзяліўся кінематаграфіст. — Гран-пры конкурсу дасталася стужцы «Апалонія, Апалонія» Леа Глоб», — дадаў ён.
Фота: Muzeum Kinematografii w Łodzi
