Пра напісанне сімфоніі паведаміў гісторык Яўген Аснарэўскі на сваёй старонцы ў Фэйсбук.
«Прадстаўляю вам маю першую сімфонію, пад назвай «Танец прывiдаў у Старым замку». Гаворка, само сабой, пра танец прывідаў менавіта ў гродзенскім Старым замку. Твор гучыць 11 хвілін з гакам. У апісанні роліка на Ю-Туб ёсць спасылка для запампоўкі. <...>
Большасць сучасных людзей далёкія ад класічнай музыкі. Больш за тое, нават сам Аснарэўскі дастаткова далёкі ад класічнай музыкі. Тым цікавей было займацца гэтай працай. Натуральна, я выкарыстоўваў у ёй падыходы, характэрныя для сімфаністаў Найноўшага часу, таму, я думаю, ясна, што вы не пачуеце тут чагосьці страшна падобнага на Моцарта ці Бетховена.
Калі раптам пасля праслухоўвання майго твора вам захочацца сказаць, што гэта занадта прымітыўна, дзіўна ды коратка для сімфоніі, то я рэкамендую вам паслухаць выбітнага кампазітара ХХ стагоддзя, Антона Вэберна (на Ю-Тубе Anton Webern — Symphony Op. 21 (1927-28) і, верагодна, нават сімфонія Аснарэўскага здасца вам амаль класікай.
Яшчэ важна трымаць у галаве праграму, ці, інакш кажучы, тэму твора. Можна любіць цёплы, прыемны джаз, але змрочная, загадкавая, напружаная музыка гэтага майго твора малюе зададзеныя загалоўкам сцэны, таму яна не такая, якую граюць у рэстаранах для добрага апетыту.
Больш за 15 гадоў я ішоў ад самавука, які нiколi не хадзіў нават у музычную школу, да кампазітара, здольнага стварыць хай і не вялікую, і адносна нескладаную ў меладычным плане, але ўсё ж сімфонію — пікавы твор музычнай іерархіі. Натуральна, я не чакаю, што твор атрымае сапраўды шмат праслухоўванняў ужо зараз, ці тым больш спадабаецца ўсім, хто паслухаў, але я буду рады слухачам. Карацей, дзякуй за ўвагу, ну i прыемнага праслухоўвання тым, хто ўсё ж будзе слухаць», — напісаў ён.
