У Беларускім моладзевым хабе ў Варшаве 9 красавіка прайшла спеўна-танцавальная вечарына. Выступіў гурт Lity Taler, скрыпачка Лізавета Рэўт і гурток традыцыйных спеваў.
Вечарына распачалася вяснянкамі «Ой, бяроза белая» і «Вол бушуе, вясну чуе». Спявачкі павадзілі разам з наведвальнікамі карагод пад «Медуніцу».
Потым перайшлі да парных танцаў: вывучылі «Верабей», «Карапет», «Базар», «Падыспань», «Польку-бабачку», «Месяц» ды іншыя. Танчылі пад дуды, скрыпку і бубен.
Ужо стала добрай традыцыяй выконваць на беларускіх канцэртах і вечарынах украінскія творы.
У моладзевым хабе праспявалі «Туман яром» па-ўкраінску і вывучылі танец «Баламут».
Завяршыла вечарыну гульня «Бабыль», таксама вядомая як «Удавец».
Для беларусаў, якія апынуліся ў Варшаве па сваёй і не сваёй волі, спеўна-танцавальныя сустрэчы — гэта нагода адчуць сувязь з радзімай, даведацца нешта новае пра ўласную культуру ці ўзгадаць старое. Для музыкаў — магчымасць паграць разам.
На вечарыну завітала таксама некалькі палякаў і ўкраінцаў, якія цікавяцца фальклорам не толькі сваіх краін.
Алена Ляшкевіч, budzma.by
Фота Андрэя Радамана і аўтаркі
